Калтаса ужара
-3 °С
Пылан
Все новости

Ачамландым аралыше-влакын кечышт вашеш Калтаса селаште Чап мемориал воктеке Кугу Отечественный сарыште кредалше землякна-влакым шарныме лӱмеш венокым пыштеныт

Тыште райрӱдысӧ ветеран-влак, Калтаса кок школын туныктышыжо ден тунемшыже-влак, пашаче коллектив-влак участвоватленыт. Ик жап шып шоген нуно сарыште колышо-влакым шарналтеныт.

Чап мемориал воктеке погынышо-влак ончылно район администраций вуйлатыше Ю.М. Садыров выступатлен:

– Таче тыште, мемнан коклаште, тылыште тыршыше ветеран, сар жапысе йоча, локальный сарын участникше, ончычсо салтак, офицер-влак улыт, – ойлен Юрий Минзарипович. – Чаманаш веле кодеш, мемнан коклаште Кугу Отечественный сарын ветеранже-влак уке улыт. Мемнан районышто нуно шымытын гына кодыныт. Таче эрдене ме нунын дене лийынна, пайрем дене саламленна. Ме тидым ыштышаш улына, нунын ончылно мемнан парымна моткоч кугу. Шукерте огыл ме тыгак воин-афганец-влакым саламлышна. Нунат сарын да тылын ветеранже семын тӱткылык деч посна кодшаш огытыл.

Кузе Юрий Минзарипович палемдыш, калтасамыт Шочмо эллан эре ӱшанлын служитленыт. Мемнан кочана ден кугезе кочана-влакын, Кугу Отечественный сарыште тушманым кырен шалатыше-влакын, чапышт мондаш лийдыме. Мемнан ныл землякналан кугу лӱмым – Совет Ушемын Геройжо – пуэныт. Шукыштым лӱддымӧ подвигым ыштымыштлан орден да медаль-влак дене палемденыт. Вара совет армий радамыште нунын эргышт ден уныкашт служитленыт, нунат элнан чекшым ӱшанлын араленыт, военный конфликт ден локальный сарлаште кредалыныт. Кызытсе самырык тукымат нунын чапыштым ок волто да салтакын лӱмжым кугешнен нумалеш. Тидыж нерген рвезе-влакын служитлыме часть гыч толшо Тауштыме серыш-влак ойлат.

Ю. Шамсутдинов.