Кожлаял гыч Зайникаевмыт еш фронтыш чыла ныл эргыжымат ужатен

Эн кугу Валикай эргыштым, тудо 1908 ийыште шочын, сар тӱҥалме икымше кече гычак фронтыш налыныт. Вашкучедалме кредалмаште тудо 1941 ийыште Калиницы ола воктене колен.

Семанай, 1918 ийыште шочын, сарыште политрук лийын. Елецк олам утарымаште колен. Елецкым 1941 ий 9 декабрьыште, Юго-Западный фронтын войскаже-влакын наступательный операцийым эртарымыштлан кӧра, утареныт. Ончык кайыше-влак радамыште политрук Семанаят лийын. Тудо йошкарармеец-влакым ончыко каяш шке примерже дене кумылаҥден.

Семен, 1913 ийыште шочын, сар тӱҥалмеке, тудо шке кумылын фронтыш каен. Горьков областьыште танкистлан тунемын. Кредалын Белоруссийым, Польшым, утарен, Берлин марте шуын. Берлин операцийыште фронтын эн кӱлешан участкыштыже 3 немыч танкым пытарен. Тидлан тудым Боевой Йошкар знамя орден дене наградитленыт.
Тудын ончыкылык ватыже Оксинья Кумушбаева сарышке 1942 ийыште каен, Иркутскысо военный госпитальыш логалын. 1943 ийыште воздушный наблюдатель-влакым ямдылыме курсым пытарен. Пеш сай колышташ тунеммеке, Оксинья, Йошкар Армийын позицийже деке тушман могай самолетшо чоҥештен толмым пален кертын. Сандене тудо эреак фронтын передовой линийыштыже лийын.

Сар гыч пӧртылмеке, Семен ден Оксинья ешым чумыреныт. Оксинья Амчемучаш медпунктышто тыршен, а Семен колхозын завскладше лийын пашам ыштен.

1957 ийыште Сарапул олашке илаш каеныт. Коктынат Кугу Отечественный сарын участникше лийыныт, сандене нунын портретышт горсовет ончылсо Почет оҥаште кечен.

Тачысе кечылан Зайникаевмыт гыч эн изи шольышт Семенка гына илыше улеш. Тений, 20 мартыште, тудо шкенжын 97 ияш шочмо кечыжым, а вара, майыште, Совет калыкын тушман Германийым сеҥымылан 75 ий темым палемдаш тӱҥалеш.

В. Иванов.