Зайдуллин Хамидуллалан «За отвагу» медальым Кремльыште ВЦИК-ын председательже Михаил Калинин кучыктен

Кугу Ачамланде сар деч вара Кугу Тогыний ялыште (тунам тудын лӱмжӧ дефис гоч да кокытшат кугу буква дене возалтын) кок фронтовик-орденоносец лийын. Тиде мемнан кочана Шамсутдинов Байрамша, III-шо степенян Чап орден дене палемдалтын, да Зайдуллин Хамидулла, Йошкар Шӱдыр орденын кавалерже, тыгак «За отвагу» кум медаль дене палемдалтын. Таче мый Хамидулла Зайдуллинович нерген каласкалынем. Тудын нерген мыланем Михаил эргыже ойлыш.

1939 ийыште Хамидулла Зайдуллиным Йошкар Армий радамыш срочный службыш налыныт, артилерийыш логалын. Самырык салтакын курсшым эртен гына, 1939-1940 ийлаште финский военный кампаний тӱҥалын. Хамидулла Зайдуллин шке йолташыже-влак дене ты сарыште участвоватлен. Патырлыкым да лӱддымылыкым ончыктен. Боевой действий деч вара военнослужащий-влак тӱшкаш логалын, а нуным Кремльыш награждатлаш ӱжыныт лийын. «За отвагу» икымше медальым Хамидулла Зайдуллинович Всесоюзный староста Михаил Калининын кидше гыч налын. Кредалмаште поснак ойыртемалтше-влаклан гына тыгай наградым кучыктеныт.

Тунам срочник-влак кум ий служитленыт, а вара, кунам Кугу Ачамланде сар тӱҥалын, Зайдуллин эше армийыште лийын. Нунын военный частьышт Турций дене чекыште верланен лийын. Сарын икымше кечылаж гычак нуным тушман-влак ваштареш кредалаш колтеныт. Кредалын шеҥгеке чакненыт, авыралтыныт, туге гынат сеҥен лектыныт.

Эргыже, Михаил Хамидуллинович, а тудым Калинин лӱмеш лӱмденыт, ачажын кредалме корныжо нерген нимомат ок пале.

– Мыланна, икшыве-влаклан, ачана сар нерген ойлен огыл, – ойла Михаил Зайдуллин. – Сар нерген фронтовик-влак пырля погынымышт годым шке коклаштышт гына шарналтен ойленыт.

Михаил ачажын сержант, отделенийын командирже лиймыжым пала. Сар жапыште Калтаса райвоенкоматыш фронт гыч серыш толын да коча ден ковалан ик центнер шыдаҥым пуэныт. Тиде, кунам Хамидуллин Зайдуллиновичым Йошкар Шӱдыр орден дене палемдыме деч вара.

Сеҥымаш деч вара Зайдуллин эше ик ий служитлен, мӧҥгыжӧ1946 ийыште гына пӧртылын. Боевой стройышто шым ий лийын, кок сар гоч лектын. Лӱддымын кредалын, тидым боевой награде-влак гоч ужаш лиеш. Ик ганат сусырген огыл, а мемнан кочанам 1944 ийыште нелын сусыргымыжлан армий гыч комиссоватленыт.

Пуля, снаряд да бомба-влак Хамидулла Зайдуллиновичым кораҥын чоҥештеныт, Юмыжак тудым саклен. А вет тудо тале да шучко кредалмашлаште лийын.

Сар деч вара Хамидулла Зайдуллинович ты ял гычак чевер ӱдырым – Шамшия Шакировнам марлан налын. Нуно ныл икшывым шочыктеныт да ончен кугемденыт – кок эргым да кок ӱдырым. Кызыт ешыштышт кандаш уныка да уныка-влакын куд икшывышт уло. Тыныс илышыште Хамидулла Зайдуллинович колхозышто тракторист лийын пашам ыштеш. 1991 ийыште 75 ияш илыш дене чеверласен.

Задуллинын икшывыже да уныкаже-влак сарын ветеранже нерген шарнен илат, тудын дене кугешнат. Эргыже ден ӱдыржӧ-влак кызыт сулен налме канышыште улыт, нуно чыланат ончыл пашаеҥ лийыныт. Ачашт ден авашт шке икшывыштым сай ончен куштеныт. Михаил райрӱдӧ предприятийлаште инженер должностьлаште тыршен, Анастасия шочмо ялыштыже ила, Владислав – Ижевск олаште, а изирак ӱдырышт Роза – Нижневартовскышто.