Все новости

Кугубай Шамыкаев Смоленск воктене кредалын, Москва ден Сталинградым арален

Шамыкаев Кугубай Шамыкаевич 1919 ийыште кресаньык ешыште шочын. Шымияш школым тунем лектын, вара озанлыкыште тыршен. 1939 ийыште Йошкар Армий радамыш каен. Мӱндыр Эрвелыште служитлен.

Шамыкаев Кугубай Шамыкаевич 1919 ийыште кресаньык ешыште шочын. Шымияш школым тунем лектын, вара озанлыкыште тыршен.
1939 ийыште Йошкар Армий радамыш каен. Мӱндыр Эрвелыште служитлен.


Кугу Ачамланде сар тӱҥалме годым, частьым, кушто Кугубай служитлен, Ленинград воктеке кусареныт. Корнышто эшелон бомбежкыш логалын. Личный составын пелыж деч шукыжо колен. Частьым расформироватленыт, Кугубай вес подразделенийыш логалын.


Моло кодшо красноармеец-влак дене пырля Кугубай Шамыкаев Смоленск воктене кредалын, Москва олам арален. 1943 ий сентябрь гыч декабрь марте Сталинград воктене кредалмаште участвоватлен.


Тыште тудо нелын сусырген. Шым тылзе госпитальыште эмлалтын. Военно-врачебный комиссий тудым строевой службым намияш пуртен огыл.
1943 ий мучаште мӧҥгыжӧ пӧртылын, ялысе Сандугась ӱдырым марлан налын. Вашке Шамыкаев Кугубайым III-шо степенян Чап орден дене палемденыт.


Пелашыж дене пырля коктынат озанлыкыште пашам ыштеныт. 50-ше ийла покшелне мемнан районышто Краснохолмский поселкым чоҥаш тӱҥалыныт. Кугубай тыште пашам ыштен, вара УБР-ыште слесарь лийын тыршен.


Ватыж дене пырля кок эргым да кум ӱдырым шочыктеныт да ончен куштеныт. Пелашыже 1978 ийыште колен, а Кугубай – 2006 ийыште. Нуным Амчемучаш ялысе шӱгарлаште тойымо.