Тушман авиаций деч олам утареныт

Наталья Аркадьевна Щербакова (ӱдыр фамилийже Шакирова) 1923 ий 10 ноябрьыште Тошто Оръямучаш ялыште шочын. 1941 ий гыч Калтаса райисполкомышто инструктор лийын пашам ыштен. Калтаса селаште родо-шочшо Мурзанаевмыт ешыште (1938-1943 ийлаште райисполкомын председательже) илен. 1942 ий апрельыште элнан оборона комитетын ӱдырамаш-влакым армийыш налме нерген пунчалже лектын. Тыгай разнарядкым чыла районыш колтеныт да комсомол райком гоч ӱдыр-влакым армийыш налыныт. Нуно кумытын лийыныт: Наталья Шакирова, Калегин ял гыч Наталья Новоселова да эше Келтей ял гыч ик ӱдыр лийын.

Имне дене ӱдыр-влакым пристань марте намиен коденыт, пароходыш шынденыт да май тӱҥалтыште нуно Уфа олаш толын шуыныт. Ты жаплан ӱдыр-комсомол деч кок эшелоным Сталинград воктеке колтеныт. Нуно вараш кодыныт, сандене Башкирийын тӱрлӧ луклаж гыч толшо 30 еҥым Ульяновск олашке связь училищыш колтеныт, тыште кум тылзе телеграфист-влак курсым эртеныт, вара сентябрьыште Брянск фронтыш каеныт.

Наталья ковам ст-55 телеграфист лийын да 102-шо полкыш логалын. Нуно чодыраште палаткылаште иленыт, командный пунктышто дежуритленыт, штабыш да воинский частьлашке телеграмме-влакым налыныт да колтедылыныт.

Наталья Аркадьевна Брянский фронтын политуправленийже пелен политсостав курсым эртен. Тунеммаш деч вара тудлан младший сержант лӱмым пуэныт да частьыште комсорг лийын ышташ тӱҥалын. Тунам тудо зенитный артиллерийыш, 319-ше посна зенитно-артиллерийский дивизионыш ты частьын комсоргшо семын логалын. Тиде 1943 ийыште лийын. Тӱҥалтыште Казань ола воктене Юдино станцийыште верланеныт, вара Венгрийыште Байя олаште. Байя гыч Югославийыш Субботица олаш, тыште сар пытен. Нуно ола, военный объект-влакым, тушманын авиацийже кержалме деч кавам араленыт.

Наташа ковам 1945 ий августышто Уфаш пӧртылын. Комсомол пашаш каен. РЭУ-9 (энергетик-влак ремесленный училище) комсорг лийын пашам ыштен, вара Молотовский комсомол райокмын инструкторжо, ты жапыштак кастене тунемме школышто шинчымашым поген да 10 классым «5»-лан гына тунем лектын. Тудо умбакыжат тунемнеже лийын. Пырля служитлыме йолташ ӱдыржӧ Вера Лукьянова дене, а тудыжо Алма–Ата олаште илен, Киров лӱмеш Казахский кыгыжаныш университетын логика, психологий да руш йылме пӧлкаш тунемаш пурен. Университетым пытарыме деч вара Николо-Березовский педучилищыште руш йылме ден литературым туныктен. Чаманен каласаш логалеш, училищым пытареныт да тудо Уфа олаш каен. 1959 ий август гыч 19 ий Уфа оласе кӱртньыгорно транспорт техникумышто туныктышо лийын тыршен.

Кызыт Наталья Аркадьевна Щербакова Уфа олаште Сергей Витальевич эргыже (психологий наука кандидат) да Роза Габдулловна шешкыже дене пырля ила.