«Калтаса ўжара» газетын призшылан верч кажне ийын эртарыме полумарафоныш тений 200 наре спортсмен погынен ыле

Марафонышто мемнан район спортсмен-влак деч посна тыгак пошкудо районла да ола гыч, Пермь кундемысе Куеда район гыч куржталаш йӧратыше-влак лийыныт. Москва гычат представитель лийын. Участник-влакын географий кажне ийын шарла да шарла веле. Мемнан марафоным межрегиональный манына гынат, йоҥылыш огына лий, докан.

Старт деч ончыч, пайрем построенийыште, чыла участникым район администраций вуйлатыше Ю.М. Садыров саламлыш. Тиде марафон самырык тукымым воспитатлымаште да калык коклаште таза илыш-койышым шарымаште кугу рольым модеш манын, Юрий Минзарипович палемдыш. Тудо чыла участниклан сай стартым тыланен да ончыкыжым тышке шукырак калык ушна манын ўшанен каласен.

Пытартыш вич ий полумарафон, полицийын капитанже, Чечняште геройла колышо Юрий Мильсонович Алексеевлан лўмдалтын. Россий МВД-ын Калтаса районысо пӧлкажын вуйлатышыже Э.В. Ляпустин организатор, марафонын участникше-влаклан, землякнам шарнен илмыштлан кугу таум каласен. Полумарафонышто кажне ийын лу дене полицийын пашаеҥже-влак участвоватлат. Тыгак Эрнест Владимирович шкежат куржеш.

Саламмутым тыгак «Калтаса ўжара» газет рекдакторын алмаштышыже С.Ю. Аркадьева да районысо спорткомитет вуйлатыше В.И. Кугубаев ойленыт.

Дистанций кум ужашлан шелылтын ыле. Ваныш корнывож марте эн изи участник ден ветеран-влак куржыныт, Калмаш марте – кугырак йоча-влак, а Калтаса марте самырык еҥ да шке вийыштлан ўшаныше-влак. Краснохолмский гыч Калтаса марте 21 километр.

Кум ий почела полумарафонышто Мишкан районын шочшыжо, Москвасе олимпийский резвер спортшколын воспитанникше Денис Валитов сеҥа. Кокымшо верым тыгак Денисын землякше Вениамин Канибеков налын, кумшо – Николо-Березовко гыч Рустам Шакирьянов.

ӱдырамаш-влак кокла гыч Москва ола гыч Мария Авдеева икымше лийын. Кокымшо ий почела «ший медальым» Анастасия Айгильдина сеҥен налеш. Кумшо вер – Нефтекамск ола гыч Эмилия Сибагатуллина. Палемдаш кўлеш, Настяланат, Эмилияланат 14 ий веле.

Полумарафонын рекордшо – 56 минутат 40 секунд. Тудым 13 ий ончыч Кугу Качак ял гыч Насипуллин Борис шынден лийын. Теният тудым нигӧ сеҥен кертын огыл. Денис Валитовын куржын толымо жапше – 56 минутат 53 секунд. Борис Насипуллин, марафонышто ик гана веле огыл участвоватлен, тенийсе таҥасымаштат шке вийжым терген. 2017 ийысе марафонышто тудо шымше лийын.