Келтей ялсоветын депутатше, Кӧтерем ялын старостаже Терехов Владимир Васильевич тиде кечылаште шкенжын 80 ияш юбилейжым палемден

Тудо 1937 ий 5 сентябрьыште Москваште шочын. Шыжым 1941 ийыште Правительствын пунчалже почеш, сарлан кӧра, кушто 5 ияш марте икшыве-влак лийыныт, тыгай ешлам Москва гыч эвакуироватленыт. Тереховмыт ешым (ава, ўдыр да эрге) Кустанай областьыш колтеныт. Ачаже фронтыш 1941 ий ноябрьыште каен. Москвам аралышыла колен.

1950 ийыште еш Молотов (Пермь) олашке кусна. 1952 ийыште Володя авиационный заводыш токарьын ученикше лийын пашашке пура. Тыште 12 ий ышта. Кастене, паша деч вара авиационный техникумышто, техник-технологлан тунемеш.19 ияш улмыж годым старший мастер лийын ышта.

1964 ийыште тудо Киргизийыш илаш кусна да Сулюкта оласе шахтоуправленийыште конструктор лийын тырша, вара мастер, тўҥ инженер, ЦЭММ вуйлатыше.

1972 ийыште тудым Таджикистаныш «Средазуголь» ушемыш ЦЭММ вуйлатышылан кусарат. 1996 ийыште Таджикистан правительствын пунчалже почеш тудым «Ленинабадуголь» производственный ушемын генеральный директоржылан шогалтат.

Сай карьерым ыштымеке, Владимир Васильевич Средний Азийыште начар огыл илен, вуйлатыше-влак коклаште шуко йолташыже лийын, тудым чыланат пагаленыт, тыгак сурт озанлыкымат кучаш етшен – шўдӧ дене мўкш еш, кролик-влак.

Но чыла тидым коден каяш верештын – Таджикистаныште Граждан сар тўҥалын. Икте-весе дене кучедалше клан-влак, руш-влакым тўкален огытыл гынат, илаш, содыки, лўдыкшӧ лийын. Калык Таджикистан гыч каяш тўҥалын. Таджикистанын президентше Э. Рахмонов Владимир Васильевичым кодаш да пашам ышташ шкежак йодын. Президентлан кузе уке манат? Но кузе пашам ышташ, кунам чыланат кугыжаныш йылме дене гына ойленыт? Икманаш, пенсий марте, тудо кузе гынат пашам ыштен да 1997 ийыште чыла коден, Российыш илаш куснен. Ончыч Пермьыште чарненыт, тыште кок икшывыже илен. Икшыве-влак дене илаш сай, конешне. Но шке озанлык дене илыме шуын. Тыге, ватыже Зиля Сафиевна дене пырля тудын шочмо кундемышкыже, Калтаса районыш илаш куснат. Тыште, Кӧтерем ялыште пӧртым налыныт, чыла олмыктеныт. Чыла шке кид дене ыштеныт. Владимир Васильевич сурт озанлыкыште шогылташ, колым кучаш йӧрата да селан мер илышыштыже чулымын участвоватла. Тудым ялын старостыжлан ойыреныт, тыгак тудо ялсовет депутат улеш.

Тудо чўчкыдын верысе йодыш-влакым решатла: участковый эмлымверым арален кодаш, сберкассым ышташ, селасе корным олмыкташ да шуко моло йодыш дене тудын деке толыт.

Кузе калыкыште ойлат «кугу корабльлан – кугу корно». Владимир Васильевичым юбилейже дене шокшын саламлена да тудлан пеҥгыде тазалыкым да чыла сайым гына тыланен кодына.