Краснохолмкий селаште пайрем чаплын эртен

Пайремын официаль ужашыже «Нефтяник» Культура пӧртын кеҥеж эстрадыштыже эртен. «Шонанпыл» йоча усталык пӧртын куштышо коллективше калыклан пеш сай, ӧрыктарыше куштымаш представленийым, а тудыжо шочмо селан шочмыжым да пеледалтмыжым раш ончыктен пуэн, пӧлеклен.

Вара погынышо калыкым ялсовет администраций вуйлатыше С.В. Цедилкин шокшын саламлен. Тудо шке кундемын шочшыжо-влакым пайрем дене саламлен да тачысе пайрем шке селажым йӧратыше тўрлӧ ийготан еҥ-влакым иктыш ушен шога манын каласен. «…Мыланна уло мо дене кугешнаш. Тиде чапле историй, кумдан палыме еҥ-влак, а эн тўҥжӧ – калык дене», – палемден Семен Владимирович. Селан кечыжын поро йўла почеш «Краснохолмский селан Почетан гражданинже» черетан лўмым пуымо. Тений тиде А.Г. Ибаев лийын. Алексей Гаврилович ятыр ийжым нефть отрасльлан пуэн. Тудо мўндыр 1971 ийыште тыште пашам ышташ тўҥалын. «Башнефтьдобыча» ООО «Арланнефть» НГДУ-ын нефть да газым лукмо 5 №-ан цехыште вуйлатыше лийын тыршен да сулен налме канымашке каен.

Пайремыш толшо калыкым тыгак Калтаса район МР администраций вуйлатыше Ю.М. Садыров, Башкортостан Республикын Кугыжаныш Погынжын – Курултайжын депутатше Б.Г. Юмадилов саламленыт. Пайрем – тиде эше селан пашам тыршен ыштыше пашаеҥже-влакым кумылаҥдаш амал. Краснохолмский 1 №-ан ЦДНГ-ын нефтьым да газым лукмо шотышто оператор Д.Ф. Шакиров РФ-ын энергетика министерстве деч топливно-энергетический комплексым вияҥдымаште да ятыр ий тыршен ыштымыжлан таум каласыман серыш дене палемдалтын. 3 №-ан Краснохолмский кыдалаш школышто кочмо верым вуйлатыше Е.В. Армянинова да «Весна» ООО кевытын вуйлатышыже В.И. Шаймарданова БР торгайымаш да потребительын праважым аралыме шотышто БР кугыжаныш комитет деч Чап грамота-влак дене чапландаралтыныт. В.А. Зворяыгинлан БР илыме вер-коммуналь озанлык министерстве деч Чап грамотым кучыктеныт. Культура министерстве шуко функциян «Нефтяник» клуб вуйлатыше Н.Д. Пята ден В.Н. Артюховлан таум каласымаш серышым кучыктеныт. Мӧҥгыштӧ социаль полышым ончыктышо пӧлкан соцпашаеҥже Л.А. Ильтыбаева БР калыклан социально аралымаш да паша министерствын Чап грамотыжо дене палемдалтын. Башкортостан Республикын Кугыжаныш Погынжын – Курултайжын Чап грамотыжо дене палемдалтыныт М.В. Никитина, С.В. Александров, Н.А. Косолапова. БР Кугыжаныш Погынжын – Курултайжын вуйлатышыже деч Г.А. Улыбиналан да А.Г. Ибаевлан таум каласыме. Чапландарымаш деч вара калык ден унамытым Башкортостан Республикын да Татарстан Республикын сулло артистше Айдар Галимов чапле концертым ончыктен. Тыште татарла да рушла муро-влак йоҥгеныт. Шагатат пеле наре жап тыманмеш эртен каен. Тыланыше-влак куштеныт, палыме муро-влакым муреныт. Айдар Ганиевич калык дене порын мутланен, автограф-влакым пуэден. Тиде пайремын организаторжо-влак деч пеш кугу пӧлек лийын.

«Чиям мушкын колташ лиеш, а пайрем татым – нигунам!» – тыге каласаш лиеш Холи чия фестиваль нерген. Тудат ты кечын эртен. Фестиваль территорийыште ару кодаш лийын огыл. Тышечат, тушечат тўрлӧ чиян порошок-влак чоҥештылыныт, ояр шонанпылым ыштеныт. Айдемын тўсшым ужаш лийын огыл. Туге гынат шыргыжмаш да поро кумыл лийын. Чия фестивальыште музыкаль феерий, модмаш, конкурс лийын, муреныт, куштеныт, тидын годым икте-весыштым тўрлӧ да ояр чия дене чиялтеныт. Тыгак пайрем спорт да модмаш площадкылаште умбакыже шуйнен. «Лидер» ДЮСШ-ын тренерже-влак кыр спорт, армреслинг, канатым шупшмо таҥасымаш-влакым организоватленыт. А икшыве-влаклан лўмын модмаш площадкым ыштыме лийын. Йоча-влак батутышто тӧрштылыныт. Тыгак торгайыме радам-влак пашам ыштеныт. Кастене самырык-влаклан дискотека да кумылаҥдымаш лийыныт. Тидат поро йўлашке савырнен. 10 шагат кастене села ўмбалне пайрем салют шергылтын.