Оливке ўйым чын кузе ойырен моштыман?

1. Салатыш, йўштӧ кочкышыш ешараш, эмлалташ але моло диетический амал дене капкыл ужашыш йыгаш, чурийыш шўрашлан кучылташ ате ўмбалан «Вирджин» («Virgin») але «Экстра Вирджин» («Extra Virgin») манын возымым ойырыман.

2. Кочкышым ямдылыме годым пареҥгым але пакчасаскам жаритлаш «Aceite de Oliva» возыманым налман. Фритюрницеш кочкышым ямдылаш «Romace» але «Aceite de orujo» оливе ўйым кучылташ лиеш. Сатун кузе ышталтмыжым палыдыме еҥым ондален, южо кевытыште тыглай рафинироватлыме (эрыктыме) оливе ўйым экстранатуральный (йўштӧ йӧн дене икымше гана пунчалме) ак денат ужален кертыт. Садлан кевыт прилавкыште шинчыше ўйын акшым веле огыл, ате ўмбалан возымо информацийым тўрыс тўткын шымлен налман.

Ак нерген. Эн шергаканлан «Экстра Вирджин» оливе ўй шотлалтеш. Тудым ыштымаште эн чапле качестван сырьем гына кучылтыт. 1 кг оливке гыч 250 мл ўй гына лектеш. Качествылан поснак кугу требованийым йодмо ты продуктым шергаканым ышта.

Экстранатуральный ўй акыштат ойыртем уло.

DOP/GP/PDO маркировкан але «биологический» (BIO) ўй, ты маркирокыдымо «Экстра Вирджин» деч палынак шергакан. ўйым ыштыше производствышто BIO маркировко химический вещества ден генномодифицированный организмым кучылтдымо нерген палдара.

DOP (PDO) пале – территорий шот дене специальный реестрыш пуртымо (куштымо гыч упаковкыш темыме марте) ўйым ик верыште ыштымым палдарыше маркировко.

IPG пале – ял озанлык реестрыш пурышо (ўйым ыштымаште ик але икмыняр этап), посна ойырымо территорийыште темыме нерген шижтарыше маркировко.

Йўштӧ йӧн дене икымше гана пунчалме оливке ўй кокымшо гана (шокшо йӧн дене) ямдылыме деч ятырлан шергакан.

Рафинироватлыдыме оливке ўй рафинироватлыме (эрыктыме) деч эре шергынрак ужалалтеш.

Кеч-могай маркировкан оливке ўйым налме годым теве мом шотыш налман.

1. ўйым Российыште огыт лук, садлан заводышто ыштыме атыште ужалалтшым веле налман.

2. Темкален ужалыме оливке ўйым мемнан элыште налаш лўдыкшӧ.

3. ўй шем яндан але калай атыш темыме лийшаш.

4. Атыште оливке ўйын могай тўшкаш пурымыжым, ыштен лукшо эл-экспортерын лўмжӧ раш возымо лийшаш.

DOP/GP/PDO маркировкан але «биологический» (BIO) пале – тиде экстранатуральный оливке ўйын качествыжым пеҥдыгемдыше маркировко. Тыгай маркировкым чўчкыдын шояклен возат. Ондалалташ огыл манын, сатум кузе ыштымым палдарыше сертификатым кевытыште йодман.

Йоҥгыт ўмбалне ўйын шопылыкшым рашемдыше цифр лийшаш. Тиде цифр 3,3 процент деч кўкшӧ лийшаш огыл. ™й экстранатуральный гын, 1 процент деч кўкшӧ ок лий.

Сатум кунам ыштымылан почмо деч вара ўйым мыняр жап аралаш лиймыланат тўткышым ойырыман. Почдымо атым 18 тылзе аралаш лиеш. Чоткыдын петыралтше ўй ате кечыйол логалдыме пычкемыш верыште шога гын, почмо деч вара тылзе кучылташ лиеш.

«Экстра Вирджин» ўйым тамлен ончаш йӧн уло гын, ойыртемже-влакым палыза:

1. Тўсшӧ ошалге-ужарге гыч шемалге-ужарге марте вашлиялтеш.

2. Кочештше, вўдым ешарыме, кўртньӧ але уксус (сатум кўлын аралыдымым шижтарыше) таман лийшаш огыл.

ўйын качествыжым мӧҥгыштӧ кузе тергыман?

Атым икмыняр кечылан холодильникыш шындыман. ўй нугыдемеш, тугеже сай. Чапле оливке ўй +7 температурышто нугыдемеш. Тыглай условийыште аралымекат, качествыжым йомдарыде, уэш вишкыдемеш.

Шергакан, тугеже сай манын шонен, ўйым налаш вашкыман огыл. Шергакан оливке ўй чылаж годымак мо шулдакан ден чаплырак? Ты йодышлан ик семын вашешташ ок лий.

Пашаже теве кушто: сатун качествыже ыштыме йӧн (кузе пунчалме) да шопылык дене чак кылдалтын. Эн шергакан – йўштӧ йӧн дене икымше гана пунчалме ўй.

Тудым, рафинироватлыдыме свежа оливкым пунчалын, атыш темат. Тыге шуко пайдале веществам: коям шулыктарыше витаминым, полиненасыщенный кислотам, фосфолипидым, микроэлемент-шамычым – арален кодаш полша.

Рафинироватлыме ўй утларак шулдылан шотлалтеш. Тыгай ўй составше дене изиш нужнарак. Пайдажат организмлан шагалрак.

Шопылык дене ыштен налме йӧнат ўйын качествыжым аклыме тўҥ негызлан шотлалтеш.