2 №-ан Краснохолмский школын волонтержо-влак ятыр поро пашам шуктеныт

Кажне еҥ шке койыш-шоктышыж дене ойыртемалтеш. Иктыже – поро, чын, вияш чонан, а кӧ-дыр шыдан, осалым гына шонышо айдеме улеш. Но тидын годым ме чыланат айдеме улына. Сандене ты лӱмым нумалаш манын, ме поро кумылан, еҥ-влак верч ойгыртышан, умылышан лияш тыршышаш улына.

Кеч-могай паша аклалтшаш манын ойлена. Но ты пашалан оксам але иктаж-могай поянлыкым налшаш огынал. Кызытсе саманыште тугок поро пашам ышташ ямде улшо еҥ-влак ятыр улыт. Нуным волонтер-влак маныт. Нунын пашашт таум каласымаш дене аклалтеш.

2 №-ан Краснохолмский КШ – тыглай школ, тыште тыглай икшыве-влак тунемыт, туге гынат кажне тунемшыш шӱм-чоныштыжо порылык тул йӱла, нуно ойгыш логалше еҥлан полшаш тыршат. Мемнан школышто волонтер-влак толкын шукертак ышталтын. Мӱндыр 2008 ийыште ышталтын да тачысе кече марте удан огыл пашам ышта.

Тӱҥалтыште волонтер паша мемнан районысо Агытан ялыште памашым эрыктыме шотышто экологический субботникым эртарымаш гыч тӱҥалын. «Поро пашам ыштыме акций» почеш тунемше-влак шке кумылын йочасадыш да Калтаса селаште йоча приютын культурный программе да шере пӧлек-влак дене миеныт. Поро пашам шуктышо чолга еҥ-влакым Уфа оласе республике елкыш ӱжыктеныт, тыште нуно тыгаяк волонтер-влак дене вашлиялтыныт. 2009 ийыште Волонтер-влакым республике слетыштышт 2 №-ан Краснохолмский кыдалаш школ чолга илышым намийымыштлан диплом да «Эн изи волонтер-влак» номинацийыште палемдалтын.

Тачысе кечылан мемнан район волонтер-влак ятыр поро пашам ыштеныт. Порылык ярмингам эртарымаш ынде поро йӱлашкак пурен, чумырымо окса полышым йодшо еҥ-влаклан кая.2015 да 2017 ийлаште чыла чумырымо оксам инвалид ӱдыр Шипаева Элеоноран счетышкыжо кусарыме лийын. 9-ше классыште тунемше-влак Элеонора деке шочмо кечыж дене саламлаш толыныт.

2016 ийыште порылык ярминга деч чумырымо оксам рак дене черле эргын – Карачурин Амирын счетышкыжо кусарыме.

2017 ий декабрьыште 2 №-ан Краснохолмский КШ-ын тӱҥалтыш класс-влак «Поро пашам ыштыме арняште» участвоватленыт, коррекционный школышто тунемше-влаклан пӧлекым ямдыленыт.

Мемнан школ гыч волонтер-влак порылык мероприятийлаште участвоватлат. Тиде «Кугу Ачамланде сарын ветеранже-влаклан тау», «Георгиевский ленте», «Пожар безопасность технике», «Водительлан серыш», «Айста поро пашам ыштена» акцийлаште, экологический субботникыште участвоватлат, икшыве-влак дене модыт, калыкым пайремла дене саламлат. Тиде ыштыме поро пашам икмыняр ужашыже гына.

Волонтер толкынын чолга участникше-влакын тачысе кечылан «Волонтерын личный книжкаже» уло, тыште могай мероприятийышке ушнымым, чыла возымо.

Тидын дене мемнан школын волонтержо-влакын пашашт ок мучашлалт. Ончылно эше ятыр поро пашам нуным вуча. Мемнан дене пырля лийнеда? Тугеже волонтер толкыныш ушныза. Тендам поро паша вучаш тӱҥалеш.

А. Абралова, «Юный журналист» школ ушемын самырык коррекспондентше.