Калтаса ужара
-10 °С
Пылан
Все новости
Новости
20 Ӱярня 2018, 13:27

Кутлубаев Кирилл мемнан районнан кугешнымашыже

Бокс дене икымше юношеский разряд, Башкирий чемпионатын да первенствын сеҥышыже, бокс дене 2018 ийыште Россий профушем первенствын бронзовый призержо, тыгак Уфа, Чернушка, Ижевск ола-влак, Пермь областьын бокс дене турнирыште сеҥыше Кутлубаев Кирилл самырык чемпион веле огыл, тудо мемнан районнан кугешнымашыже улеш.
Кирилл эше шым ияш улмыж годымак единоборство дене заниматлалтын, кикбоксинг дене икымше тренерже Валерий Владимирович Марков лийын. Лач тудо Кириллым спортлан шӱмаҥден да икымше сеҥымашке конден. Эше тидым каласен кодынем, кикбоксинг дене гына огыл, а спортын моло видше дене кылым кучышо ятыр ӱдыр ден эрге тренер Марков нерген сайым веле ойлат. Пеш жал, тудо ындыжым районысо самырык спортсмен-влак дене пашам ок ыште.
10 ияш гыч К. Кутлубаев Нефтекамск оласе бокс школыш коштеш. Кызыт Кириллан 13 ий, тудо республикын эн виян спортсменже-влак радамыште улеш.

– Мый шкемым да лишыл еҥем-влакым аралаш манын, бокс дене заниматлалташ тӱҥальым. Тидын годым бокс – шуко шонаш таратышан спортын видше, тыште перен пуымо шотышто навык веле огыл лийшаш, тыгак шуко шоныман, кучедалмашын чыла вариантшымат шотлен лекман, – ойла Кирилл.


«Сеҥымашын могай кӱкшытышкыжӧ шуаш тыланет?» йодышемлан Кирилл тыге каласен:

– Ончыкыжым мый кучедалмашын мастерже, бокс дене спортын мастерже лийнем, вара спортын сулло мастерже.
Кирилл ик гана веле огыл ончыл радамыш лектын, тудлан «Мо тугай сеҥымаш?» раш каласен кертеш. «Кеч-могай таҥасымаште сеҥымаш, тиде мыйын кажне кечын тренировкыш коштмо пашам, тыгак тренерын пашаже», – кугешнен каласыш спортсмен.
Кызыт тудым Роберт Борисович Гумеров ден Марат Рузелевич Шакиров тренироватлат.

– Мый нунылан кугу таум каласен, нуно мыланем боксышто шуко вниманийым ойырат да мыйым талантан да моштышан спортсмен семын ужыт, – ойла Кирилл. – Мыйын кажне сеҥымашем – нунын пашашт.

Спорт деч посна Кирилл школышто сай тунемеш. Кызыт тудо 7-ше классыште шинчымашым пога. Кузе тудо ойла, тунемаш йӧрата, нылыт ден визытаным гына налеш, раш дисциплине дене предмет-влакым шымла.
Мутланаш йӧратышан, ушан-шотан, сай рвезе улеш. Тунеммаште да спортышто тыгай сеҥымашлашке шумыжлан ача-аважынат надырже уло. Наталья Рашидовна ден Руслан Ильич Кутлубаевмыт сай икшыве-влакым воспитатленыт. Кириллын Анастасия акаже уло. Тудат шке ачаж ден аважым сеҥымашыже-влак дене куандара. Баскетбол дене районысо таҥасымашлаште шуко гана чемпионка лийын, школым шӧртньӧ медаль дене тунем пытарен да Башкир кугыжаныш медицина университетыште тунемеш. Кирилл дене мутланымеке, мый иктым умылышым, тудо ты званийым налшаш. Чытымаш да тыршымаш дене шке шонымашыже шукталтеш манын шонем. Кӧ пала, ала мый тӱнян ончыкылык чемпионжо дене мутланенам…
В. Мухултдинова