Калтаса ужара
+15 °С
Пылан
Все новости
Новости
20 Ӱярня 2018, 13:20

Порысым жапыштыже тӱлыман

Парымым, йозакым, кредитым, алиментым, штрафым тӱлыдымӧ еҥ-влак дене пашам намийымаш – Калтасасе суд пристав-влак пӧлкан ик эн тӱҥ пашаже. Ты службын пашаже нерген мемнан газетланна пӧлка вуйлатыше, старший судебный пристав Валерий Петрович Тимиряев каласкален лектын.


– Чаманен каласаш логалеш, тӱлыдымӧ еҥ-влак деч порысым суд почеш пӧртылтымӧ паша мемнан районышто нимынярат ок шагалем. Эртыше ийыште суд пристав-влак дене пашаште 7781 исполнительный производство лийын, 204 млн. теҥге парышым пӧртылташ кӱлын, тидыже 2016 ийысе дене таҥастарымаште исполнительный производство ятырлан шукемын, 410 шуын, поген налме окса – 41 млн. теҥге утла. 5349 исполнительный производствым тарватыме, 2016 ийысе жап деч 231-лан шукырак, 124 млн. теҥгем пӧртылташ кӱлын.


Мемнан пӧлка план почеш заданийым тичмаш шуктен, посна показатель-влак денат утыж дене шуктымо: 411 тӱжем теҥгем поген налме (план почеш 327 тӱжем теҥге), 2714 тӱжем теҥге йозакым пӧртылтымӧ (план почеш 642 тӱжем теҥге), 3640 тӱжем теҥге штрафым тӱлыктымӧ (план почеш 2801 тӱжем теҥге).


Тӱрлӧ бюджетлашке 6815 тӱжем теҥгем кусарыме, топливно-энергетический комплексын организацийлашкыже – 2771 тӱжем теҥге, ЖКХ-лан – 1331 тӱжем теҥге.

Арестоватлыме погым 881 тӱжем теҥгелан ужалыме.


– Валерий Петрович, шке икшывыштлан алиментым тӱлыдымӧ ача-ава-влак дене пашам кузе ыштеда?

– Алиментым тӱлымӧ пашат мия. Тиде пашадар гыч оксам кучен кодымаш, могай пого улмо нерген пален налмаш да поген налмаш, Россий гыч лекме шотышто ограничительный мерым палемдымаш. Тӱлыдымӧ еҥ-влакым поснак наказатлыме лиеш, эрык деч поснак коден кертыт. РФ Уголовный Кодексын 157-ше статьяже дене келшышын, 18 уголовный пашам тарватыме. 2017 ийыште судебный пристав-влак дене пашаште 343 исполнительный производство лийын. 187 исполнительный производствым тарватыме.

2017 ийыште тулык икшыве-влаклан илыме верым пуымо шотышто 7 исполнительный лист пурен.


– Судебный пристав-влакын эше ик пашашт – тиде йӱшӧ вуя автомашинам виктарымылан ГИБДД штрафым тӱлыдымӧ шотышто порысым пӧртылтымаш.

– Икымше пелийын йӱшӧ вуя автомобильым виктарыше водитель-влак шотышто 39 исполнительный производствым тарватыме. 1140 тӱжем теҥге штрафым пӧртылтымӧ.


– Тачысе кредитым налаш пеш куштылго, поснак микрофинансовый организацийлаште. Налаш куштылго, а пӧртылтымӧ шотышто нелылык лектеш.

– Чын, чыланат огыл тидын шотышто вуйын шогат. 2017 ийыште кредитный организаций-влаклан оксам пӧртылтымӧ шотышто 729 исполнительный производство ончымаште лийын, 77877 тӱжем теҥгем пӧртылташ кӱлын, тидын годым кредит шотышто тӱҥ должник-влак – 720 – тыглай еҥ-влак.


Эше тидым палемдаш кӱлеш, 2017 ийыште пристав-исполнитель-влакын пашаштлан кӧра, судышто чрезвычайный проишествий-влак лийын огытыл.


С. Аркадьева