Чодыраште тул пижме тӱҥ амал – айдеме

Кажне кечын СМИ ден телевиденийыште чодыраш тул пижме нерген серат да ончыктат. Чодыраш тул пижме тӱҥ амал – айдемын тул дене сак лийде пайдаланымыже.

Районысо чодыра озанлык пашаеҥ-влак кугу профилактике пашам намият: шыже гыч чодыралаште минерализованный полоса-влакым ыштат, калык лийме верлаште аншлаг-влакым пижыктат, чодыра-влакым патрулироватлат.

Тӱҥжӧ «тулым чыкыше-влак» кокла гыч тиде – пӱртӱс лоҥгаште канаш йӧратыше турист-влак, емыж ден поҥгым погышо, тыгак сонарзе ден колызо-влак.

Чодыраш тул пижмым ужмеке, тудым вигак йӧрташ пижман, тудлан шарлаш эрыкым пуаш ок кӱл. Тыгодым кертме семын чодырам аралыме органлаш, МЧС-ш, верысе органлашке йыҥгырташ тыршыман.

Пожарым йӧртымӧ годым лӱдыкшыдымылык правил-влакым шуктен толман.

Чодыраште тамакым шупшман огыл, уке гын, костерым ылыжтыме верыште веле «тӱргаш» тыршыман. Ошкыл кайыме годым шупшман огыл, вет шоналтыде шырпе пырчым але тамака окуркым кудалташ лиеш. Тыгай шотдымылыкын результатше – пожар.

Сандене чодыраште шкем кучен моштыман да пожар ваштареш кучедалме неле огыл правил-влакым шуктен толман. Тыге веле ме чодырам тул деч арален коден кертына.

З. Сафин, «Калтаса чодыра» АУ вуйлатышын алмаштышыже.