Районысо мланде пашаеҥ-влак икияшым ӱдымӧ годым, ни нойымым огыт пале, ни жапым огыт ончо. Игече сай шогымо годым пашам вашкерак ышташ тыршат

Ялыште шошо ага, кургым ямдылыме да уржа-сорла жапыште шагатым огыт ончо. Жапым кече лекме да кече шичме дене ончат. Эр гыч тӱҥалын кас марте пасушто паша шолеш. Шошо агам мыняр ончыч пытарет, тунар сай. Тиде кечылаште ме ИКЦ-н специалистше-влак дене пырля районысо икмыняр кресаньык-фермер озанлык ден ял озанлык кооперативлаште лийна. Ончен коштмо деч сай шонымаш кодын.

Кунам Кӱшыл Качмаш, Амчемучаш ялыш наҥгайыше корно дене пурышна, мемнан шинча ончыланна моткоч сылне сӱрет почылто. Курык тайыл ужар да пычкемыш сур тӱс дене волгалтын – ужаргыже – шукияш шудо, кокияш озым, а сур тӱсанже – кызыт обрабатыватлыме мланде. Тыште шӱкшудо да чашкер, тыгыде пушеҥге дене петыралтше пасу-влакым ужаш ок лий. Тыште кажне мланде ужашым пайдалын кучылтыт.

– Поро совет жапысе гай, – ожсым шарналтен пелыштыш ИКЦ-н тӱҥ агрономжо Мухтаров Борит.

Шем сур изирак курыкышто икмыняр верыште пурак веле лектын шинчен, тудым ончен ме агрегат-влак кушто кызыт пашам ыштымым пален нална.

Кок агрегат пурса дене йӧре шожым ӱденыт. Иктыжым КФХ вуйлатыше Бикмурзин Владислав шке виктарен, кокымшыжым – Байрамов Леонид.

– Эр пычкемыж гыч кас пычкемыш марте пашам ыштена, – ойла Бикмурзин Владислав. – Кечылан 200 гектар марте ӱдена.

Бикмурзинын районышто эн кугу кумдык-влак. Тений шошым икияш культурым гына озанлыкыште 3,5 тӱжем гектар кумдыкышто ӱдаш палемдалтеш. А вет эше шукияш шуко, кокияш культура-влак улыт.

Чыла тиде пашам жапыште шукташ техникат, пашаеҥат вет кӱлыт.

А озанлыкыште тидыжат, тудыжат уло. Пасу паша тӱҥалтыштак вӱдыжгым петырымаште да тырмалымаште гына 8 агрегат пасушто тыршен. Мландым культивироватлымаште кызыт кугу куатан Т-150 трактор дене Аптриев Сергей ден Байрамов Владислав тыршат. Ӱдымӧ деч вара мландым Васильев Денис катковатла. Тыгак механизатор-влак Имуков Андрей, Васильев Станислав, Искибаев Виталий, Кайрламанов Валерий пашам тыршен ыштат. Чылаже озанлыкыште шошо агаште 14 пашаеҥ тырша. Ончылан шындыме задачыштым нуно сайын шуктат манын ӱшанен кодына. Кинде лектышат Бикмурзинын, моло ийласе семынак, сай лийшаш.

Чапаев лӱмеш ООО-ште ӱдышаш кумдык кугу огыл гынат, пашаже ятыр. Тыште 319 гектар кумдыкышто икияшым ӱдаш палемдалтеш. Туге гынат, пашаже ятыр. Сайтиев Григорийын звеножо ӱдымӧ пашам шукта. Гусеничный ДТ-75 трактор ӱдымӧ кум агрегатым пижыктен икияш пасум тырмала. Шожым ӱдат. Звеношто Сайтуков Виктор, Шуматов Федор да Иванов Владимир тыршат. Т-150 да МТЗ-80 трактор-влак дене Шакиров Леонид ден Хайретдинов Давид мландым ямдылымаште пашам ыштат. Кумужбаев Виталий ӱдымӧ деч вара мландым петырен мия.

Озанлыкыште пытартыш гектарлаште паша шолеш.

Марий Мераҥ ялыште Кумушбаев Сергейын КФО-ат ӱдымӧ паша мия. Тыште шожым, шыдаҥым ӱдат. 300 утла гектарыште икияшым ӱдымӧ лиеш. Ӱдымаште механизатор Кумужбаев Анатолий МТЗ-80 тракторжо дене удан огыл тырша. Илтубаев Сергей ден Кумужбаев Александр мландым ямдылат.

Шошо пасу паша деч пашан ветеранже, киндым ончен куштышаште сай палыме пашаеҥ Ишинбаев Петрат ӧрдыжтӧ кодын огыл. Т-40 трактор дене тудо ӱдымӧ агрегат деке пырчым шупшыкта.

Морко ял пасулаште шошо агам Иванов Сергейын кресаньык-фермер озанлыкше намия. МТЗ-80 трактор дене Кумужбаев Евгений ден Бикбаев Александр ӱдат. Т-150 трактор дене Николаев Юрий мландым ӱдаш ямдыла. Шошо агаште чылаже 6 механизатор тырша.

«Новый путь» ял озанлык кооперативыште тений икияшым 900 гектарыште ӱдаш шонат. Тиде – шож, шыдаҥ, пурса да шукияш шудо.

Ӱдымӧ агрегат дене механизатор Насипуллин Андрей, мландым ямдылымаште Султанаев Андрей, Шафаратдинов Артур, Губаев Родион ден Афанасьев Аркадий тыршат.

Ю. Шамсутдинов.