Калтаса ужара
-11 °С
Пылан
Все новости
Новости
13 Сӱрем 2018, 12:16

Селаште тыгай чапле туныктышо ила

Уремыште кеҥеж. Тиде каналташ, куанаш, пакча-саска емыжым погаш жап. А эше тиде чапле кеҥежым мемнан пашам пырля ыштыме йолташна – Хабирова Роза Назаровнан шочмо кечыже. Тудлан 55 ий темеш. Чапле юбилей.
Роза Назаровна Бирск оласе педагогика институтым тунем пытарен да руш йылме ден литературым туныктышо специальностьым налын. Тудо шочмо Краснохолмский селашкыже пӧртылеш да шке ӱмыржым школлан, икшыве-влаклан пӧлекла. 1987 ийыште да тачысе кече марте Роза Назаровна 3 №-ан Краснохолмский кыдалаш школышто тырша.
Пашам сай ыштымыжлан БР образований министерствын Чап грамотыжо да «РФ чумыр образованийын почетан пашаеҥже» лӱмым налын. А эн тӱҥжӧ – тиде Роза Назаровнан туныктымо икшыве да нунын ача-авашт деч тау мутым колмаш.
Тудо шке предметшым да тудым туныктымо методикым сай пала. Р. Назаровна урок-влакым оҥайын эртараш тырша, сандене тунемше-влак руш йылме ден литературым сай палат, уроклашке кумыл шуын коштыт.

Роза Назаровна тунемше-влакым шонаш, анализироватлаш, таҥастараш туныкта. Пашам пырля ыштыме йолташыже-влак тудым талантан туныктышо да ик тукым веле огыл тунемше-влаклан шинчымашым пуышо семын пагалат. Икмыняр ий тудо руш йылме ден литературым туныктышо-влакын методушемыштым вуйлатен, конкурслан да предмет дене олимпиадыш сеҥыше-влакым ямдылен.
Тудо шке пашажым йӧратыше, ончыко ончышо, пашаштыже педагогика да методический мастарлыкым кучылтын моштышо туныктышо улеш.
Роза Назаровнам тыгак поро да сай озавате семын сай палат. Альфис пелашыж дене пырля мотор пӧртым чоҥеныт. Алмаз эргышт шке сеҥымашыж дене ачаж ден аважым куандара, тений тудо университетым тунем пытара. Йолташыж ден родо-шочшыжо-влакат огыт мондо – угыч Роза Назаровна кухня плита воктене шогылтеш але фея семын – шке пеледыш пакчаштыже. Тудо шкенжым пиалан ӱдырамашлан шотла. Вет паша илышыже тудлан лач куаным конда.
Пагалымаш дене 3 №-ан Краснохолмский КШ коллективше.