Калтаса ужара
+6 °С
Пылан
Все новости
Новости
25 Сентябрьыште 2018, 14:12

Шокшо кӱртньын моторлыкшо

Вадим Шараев ончыч районысо Культура пӧртыштӧ водитель лийын тыршен. Шофер паша тугай – рульым пӱтырӧ да кушко каласат, тушко кудал. А чон ала-мом весым йодын… Мом – шкеат умылен огыл. Но содыки, шонымыжым шукташ тыршен. Райрӱдысӧ ончысо котельныйым налаш лиеш мо, шонаш тӱҥалын.
– Лиеш, конешне, – вашештеныт тудлан. – Но тудо тыланет молан, Вадим?
– Ужыда.
Ужыныт, кунам Шараев, шке предприятийжым регистрироватлен да шофер вургемым апшатын фартукшылан, а рульым – неле чӧгытлан – вашталтен.
– Апшат паша дене мо кылдалтын, мыланем чыла оҥай, – ойла тудо. – Мом гына таптен омыл, очыни, шуршым гына. Да тудым тапташ тӧченат ончен омыл. Молан кӱлеш? Вес паша кунам коҥгам, капкам, беседкым, лӱҥгалтышым таптет – нуно кеч-кунамат кӱлешан улыт, поснак села ден яллаште. Сандене йодмаш-влак идалыклан ситат.
Шкетын, конешне, тынар пашам шукташ ок лий. Тудлан эргыже-влак Максим ден Кирилл полшен шогат. Да ачажат, Виктор Шарафиевич, полшаш эре ямде улеш. А кунам чыланат пырля ыштат – пашашт ушна да вашкерак кая, фантазият поян. Шкаланже, ончыкылык тукымлан Вадим фамильный гербым таптен. А тудын эргыже-влак, Калтаса мучко ончычсо котельныйыште ямдылыме мотоцикл дене кудалыштыт. Тидлан шуко рвезын чонжо йӱла, докан.
– Мый тудын дене шагатыште 70 км марте каен кертам, – моктанен ойла Максим. – Кызыт ачам дене эше мом ышташ лийме нерген шонкалена. Миен лектеш гын, тунам иктат поктен шуын ок керт.

Мемнан геройна – шке принципан, нунын деч тудо кораҥаш ок шоно.
– Мыланем паша, оксам ыштен налме конвеер огыл. Кӱртньӧ мыланем илыше гай улеш. Кажне арверыште шкемын чонемын ужашыжым кодем. Тыге огыл гын, тиде пашам кудалташ кӱлеш. Да эше: банк гыч кредитым налман огыл. Конешне, икмыняр суммым налын, пашам ворандарен колташ сай тудо. Вет варажым садыгак тудым пӧртылташ кӱлеш.
Кӧм гын, ик шагатланат пашам шукырак ышташ тарватен от керт. А Шараев шагатым ончыде тырша. Южгунам гын тудым йомдарен родо-шочшыжо-влак налаш толыт. Тудо кидым веле лупшалеш да пелешта: «Кӱртньӧ дене мутланен пытараш жапым пуыза».
А. Ничков.