«Мый кресаньык пашаште шуаралтынам». Тыге ойла шкеж нерген механизатор Валерий Петрович Бикмурзин

Газетнан ик номерыштыже ме Бикмурзин Владислав Петровичын кресаньык-фермер озанлыкыштыже тыршыше механизаторым кӱкшӧ правительственный награде – Башкортостан Республикын Чап грамотыж дене палемдыме нерген возенна ыле. Чап грамотым тудо ял озанлык сферыште шуко ий да пашам тыршен ыштымыжлан налын. Бикмурзинлан наградым Ял озанлык пашаеҥын кечыжым палемдыме пайрем мероприятийыште БР Правительствын Премьер-министрже Феликс Марданов кучыктен.

Валерий Петрович Владислав шольыжын кресаньык-фермер озанлыкыштыже механизатор лийын тырша. Чын каласаш гын, нуно пырля озанлыкым вӱдат. Валерий Петрович вуйлатышын рольжым шольыжлан пуэн, туге гынат, кресаньк-фермер озанлык вияҥмаште кугу полышым ончыкта. Озанлыкыште кеч-могай пашаштат тудо кугу рольым модеш, эре ончылно улеш. Икманаш, тудо Владислав Петровичын алмаштыжыше.

Валерий Петрович пеш сай механизатор улеш. Изинекак тудо тиде пашалан шӱмаҥын, техникым йӧратен шынден. Икымше туныктышыжо ачаже – «За коммунизм» колхозын ончыл да сулло механизаторжо – лийын. Петр Бикмурзин чыла моштмыжым, палымыжым, шинчымашыжым эргыже-влаклан коден.

– Ачана мемнам тӱҥалме пашам мучашке шукташ туныктен, нигунамат пел корнеш чарнен шогалын огынал, – ойла Валерий Петрович. – Кеч-могай пашаштат профессионал лияш кӱлеш. Уке гын, нимогай сеҥымашке шуаш ок лий.

Валерий Петрович кӱкшӧ классан механизатор – киндым куштышо. Чыла маркан трактор да комбайн дене ыштен кертеш. Озанлыкыште тудо МТЗ-82 да Т-150 трактор-влак дене куралеш, тырмала, ӱда, шудым сола да пога, сенажым ямдыла. Кунам кӱлеш, комбайн штурвалыш шинчеш. Икманаш, ял озанлыкыште тудо чыла пашамат ыштен мошта.

Бикмурзинын кресаньык-фермер озанлыкше районышто ончылно улеш. Тудын вияҥмашкыже изи огыл надырым Валерий Петровичат пыштен шога.

Кажне ийын тудо пасу пашалаште кӱкшӧ производсвенный показательым ончыкта – шошо ага, уржа-сорла жапыште. Шокшым кергалтенак тырша. Кузе ачаже туныктен, пашаште, профессийыште ончылно лияш тырша.

– Мый кресаньык пашаште шуаралтше улам, – ойла Валерий Петрович. – Вес семын пашам ыштен ом мошто.

Ю. Шамсутдинов.