Ача-авалан эре йоча кодыда

Самырык пагыт годым (утларакшым подростко жапыште) ача-ава да икшыве кокласе кыл поснак лушкыдемеш. Ача-ава-влак шке шотшо дене шочшыштлан полшынешт, сай ойым пуаш тыршат, но самырык-влак тидым шотыш огыт нал. Ача-ава утыждене палынешт, сандене нунын ӱмбак йоча-влак йӱкым кугемдат. Кузе тидын деч кораҥаш?

Шукыж годым ваш умылыдымылан кӧра тума лектеш. Умылаш манын, икшыве ача-аван шке йоча пагытшым шарналташ йодшаш. Очыни, нунат тыгаяк лийыныт, но йоча жап эртыме семын чылажат мондалтын. Ача-аван йоча пагытыштым пырля шарналтен, шуко уым пален налыда, шонымашат вашталтеш.

Кужун мутланен огыда шинче гынат, кеч 10-15 минутым кажне кечын ойырыза. Шке нерген огыда каласкале гынат, ача-аван пашашт нерген огыда каласкале гынат, ача-аван пашашт нерген йодса, ала шкенданат каласкалаш кумылда лектеш.

Шукынжо тамакым шупшыт, аракам йӱыт да кугу лиймышт гай чучеш. Но тиде – йоҥылыш шонымаш. Кушкын шумыдам паша дене ончыктыза. Мутлан, ача-ава толмылан кочкаш ямдыледа, пашам шке ышташ тӱҥалыда. Тунам тендан кушмыда коеш.

Шарныза, ача-авалан ме эре йоча кодына. Кеч 15, кеч 40 ияш лийына гынат, нуно мемнан верч тургыжланат. Тидын деч нигуш от шыл. Ача-аван вӱрыштыштак тиде уло: йоча нерген шонаш да ойгыраш. Сандене кунам тыланда туныктен але вурсен ойлат, ида сыре, а шотыш налза.

«Кугарня» газет гыч налме