«Пашан результатшым ончен кумыл нӧлтеш» – тыгерак ойла Бикмурзинын кресаньык-фермер озанлыкыштыже тыршыше вольык ончышо Юрий Аймурзин

Ялыште шочын-кушшо кажне еҥ изинекак вольыкым ончаш тунемеш. Тиде курым гыч курымыш шуйна. Но чыланат тиде сомылым шукташ огыт йӧрате. Тыште, очыни, вольыкым чот йӧраташ кӱлеш. Тыгай еҥ веле вольык дене пашам ыштен кертеш, докан. Юрий Антонович Аймурзин вольык ончышын пашажым шӱм-чон йодмыж почеш ойырен налын. Тудо вольыкым изиж годсек йӧрата да онча, поснак – имньым.

Юрий Аймурзин Марий Мераҥ ялыште шочын. Школым тунем лекмыж деч вара верысе «Трудовик» колхоз фермыште тыршаш тӱҥалын. Чыла шӱдымӧ пашам кумылын шуктен, сандене тудым пашам пырля ыштыме йолташыже ден озанлык вуйлатыше-влак пагаленыт. Колымшо курымын индешлуымшо ийла мучашке лишемын. Реформо, дефолт, колхоз-влак шаланымаш тӱҥалын. Нунын коклашке «Трудовик» колхозат логалын. Юрий Аймурзинат паша деч посна кодын. Но пиалешыже тудым пӱрымаш Бикмурзин Владислав Петрович дене вашлийыктен. Бикмурзин тунам лач шкенжын кресаньык-фермер озанлыкшым ышташ тӱҥалын улмаш. Тудлан лач вольык ончышо-влак кӱлыныт. Тудо Аймурзинмытлан – Юрий ден Ольгалан – пашам да илыме верым ойыраш темлен.

Аймурзинмыт тидын дене келшеныт, молан манаш гын, Марий Мераҥыште нунылан паша да нимогай ончыкылык лийын огыл.

2002 ий гыч нуно Кӱшыл Качмаш ялыште илаш тӱҥалыныт. Бикмурзин мутшым кучен, тыште нунылан пӧртым налын пуэн. Юрий Аймурзин кресаньык-фермер озанлыкыште имньым да вольыкым ончаш тӱҥалын, а Ольга ватыже – ушкалым лӱшташ. Тыге, Аймурзинмыт шкаланышт пашаверым да пӧртым муыныт, а Бикмурзин шке командышкыже пашам йӧратыше да пашам тыршен ыштыше пашаеҥ-влакым налын. Теве ынде Аймурзинмыт тыште 16 ий пашам тыршен ыштат.

Юрий Антонович тӱҥ шотышто имне-влакым онча, а озанлыкыште нунышт 200 вуй наре. Тыгак кӱлеш гын, кӱтӱчӧ-влакымат вашталтен кертеш. Икманаш, чыла вере шуэш. Кеҥежым имне-влакым кӱташ да телым нуным пукшен гына лукмо дене паша ок кае. Юрий Антонович нуным орва ден терым кычкен кошташ туныкта. Тиде паша куштылго огыл, кугу чытымашым йодеш. Тудо кажне имне деке кылым муын мошта.

– Мыйын пашамын шке сектерше уло, конешне, – ойла Юрий Антонович. – Но эн тӱҥжӧ – вольыкым йӧраташ кӱлеш. Имне-влак тидым вигак шижыт, нуно ласкалыкым йӧратат.

Аймурзин КФО-н имне кӱтӱжым шкенжын вич парняж гай пала. Кунам шочын, кӧ деч шочын, тудын могай характерже да молат. Кажне имньын шке лӱмжӧ уло.

Юрий Антонович район сабантуйышто кажне ийын участвоватла. Пытартыш куд ий жапыште эре ончыл верлам налеш. Башкир тукым Адмирал лӱман имне дене эре ончылно улеш. Тыгак бригадир-влак конкурсышто чӱчкыдын сеҥа.

– Пашан результатшым ончен, шӱм-чонышто куан шочеш, –ойла Юрий Антонович Аймурзин.

А тудын результатше кеч-кунамат сай – пашаштат да таҥасымаштат.

Ю. Шамсутдинов.