Калтаса ужара
-11 °С
Пылан
Все новости
Новости
7 теле 2018, 12:16

Ял озанлыкын ончыкылыкшо – кооперацийыште

Кодшо арнян районышто ял озанлык потребительский кооператив-влакым шочыктымо шотышто семинар эртен. Тыште районысо ялсовет вуйлатше, кресаньык-фермер озанлык вуйлатыше-влак участвоватленыт. Погынышо-влак ончылно кӱшнӧ ончыктымо теме дене «Центр сельскохозяйственного консультирования РБ» ГБУ-н вуйлатышыже И.З. Сакаев выступатлен.
Семинар-погынымашым почшыжла район администраций вуйлатыше Ю.М. Садыров, ял озанлык потребительский кооператив-влакым ыштымаш – районышто ончыкыжым ял озанлык производство вияҥмаш да пашавер-влакым шочыктымаш манын палемдыш.
– Кызыт пашам ыштен кертше калык шукыжо вес регионлашке пашашке коштеш, – ойла Юрий Минзарипович. – Ме чыла шотыштат сай йӧн-влакым ыштышаш улына, тунам веле калык шочмо кундемжым кудалтен каяш да ешым пукшаш манын ӧрдыж верыште пашам кычалаш ок тӱҥал.
Республикысе ял озанлык консультирований рӱдерын вуйлатышыже Ирик Зуфарович Сакаев погынышо-влаклан тиде программым мемнан регионышто илышыш кузерак шыҥдараш лийме нерген каласкален. 2017-2018 ийлаште мемнан республикыште чылаже 150 кооперативым ыштыме, тышке 1306 пайщик ушнен. Тиде тӱҥалтыш веле. Тений тиде программе почеш у законодательный базым ыштыме, республике бюджет гыч ял озанлык коопертив-влакым ышташлан вес ий 300 миллион теҥге субсидийым ойырат.
Кооперативын тӱҥ пашаже – кугу оксам налмаш огыл, а кооперативыш ушнышо-влакын экономике интересыштым обслуживатлымаш, нине озанлык-влакын окса лектышыштым кугемдымаш. Кооператив сатум перерабатыватлаш гына огыл, тудым ужалашат тӱҥалеш. Тыгак тудо кооператив член-влакланат сатум ситарен шогышаш улеш. Тыге шонен пыштыме. Но кажне кооператив пашажым шке шонымыж почеш чоҥен кертеш.
Республикысе ял озанлык министерствын консультацийым ончыктен шогышо рӱдерыште лӱмын группа-влакым ыштеныт, лач нунылан потребительский кооператив-влакым шочыктымо да нунын пашашт шотышто йодыш-влакым пуаш лиеш.

Ял озанлык потребительский кооперативым ышташлан да регистрироватлашлан кӱлеш:

– инициативный группо (пайщик-влак) ден оргкомитетым ышташ;
– кооперативын учредительный погынымашыжым ямдылаш да эртараш;
– кооперативын уставшым ышташ;
– документ-влакым регистрацийылан ямдылаш да сдаватлаш;
– кооперативын пашаж нерген бизнес-планым ышташ;
печатьым ямдылаш да расчетный счетым почаш (регистраций деч вара).

Мемнан районышто тиде пашам информационно-консультационный рӱдер (ИКЦ) шуктен шога.

Кызыт ялсовет вуйлатыше-влаклан калык дене пашам намияш да ял озанлыкын могай видше дене кооперативым почаш кӱлмӧ нерген кутыраш кӱлеш. Вара, у ий тӱҥалтыште, калык дене погынымашым эртараш тӱҥалыт, тушто ял озанлык консультирований рӱдерын специалистше-влак участвоватлаш тӱҥалыт. Тиддеч вара кооперативым ыштыме шотышот инициативный группылам ыштат. 2019 ийыште мемнан районыштат кеч кок-кум коопертив лиеш манын ӱшаныме шуэш.

– Касвел эллаште чыла ял озанлык пашаеҥ-влак кооперативлашке ушненыт. Тыге пашам ышташ куштылгырак да озанлыкым вияҥдаш йӧнанрак. Меат тышке кунам гынат толын шуына. Эн тӱҥжӧ - тиддеч лӱдман огыл, икте-весылан ӱшаныман. Тунам веле чыла миен лектеш.
Ю Шамсутдинов.