Кӧтерем кыдалаш школ директор Татьяна Михайловна Бараш пашаштыже кӱкшӧ результатлашке шуэш

Школ мо гыч тӱҥалеш? Конешне, тыгай еҥ-влак деч, кӧ шке илышыжым школлан пӧлеклен.

1981 ийыште Бараш Татьяна Михайловна Калегин школышто пашам ышташ тӱҥалын. Тудо школ директорын ешыште шочын, сандене туныктышын пашаже куштылго огылым пеш сай пален, туге гынат тудо туныктышын профессийжым ойырен налын.

Татьяна Михайловна руш йылме ден литературым туныктен але РОНО-то методист лийын ыштен, кеч-куштат тудо кӱкшӧ результатлашке шуаш тыршен.

2007 ий гыч Татьяна Михайловна Кӧтерем кыдалаш школ директор лийын тырша. Ты жапыште чылажат лийын – куанжат, ойгыжат, сеҥымашыжат…Тиде кажне кечын шуктымо куштылго огыл паша. Школ Татьяна Михайловналан – илышыже, куанже, призванийже. Школ директор лийын ышташ тӱҥалмеке, тудо шкенжым сай администратор семын ончыктен, пеленже сай да келшен илыше коллективым чумырен. Татьяна Михайловна тунемме процессым моштен организоватла, коллективым мастарын вуйлата.

Тудо тыгак туныктышо-влакын шонымашыштым колыштеш, нуным умылаш, нунылан полшаш тырша. Тудо опытан туныктышо-влакымат да кызыт гына пашам ышташ тӱҥалше туныктышо-влакымат ик семын пагала. Тудын воктене пашам ыштыше-влаклан тудо ӱшаным шочыкташ полша, туныктышо-влаклан кеч-могай тӱҥалтышыштат полыш кидым шуялташ ямде улеш.

Тудо илышыштат тыгаяк поро, тыматле, полшаш ямде улшо. Районышто, селаште лектын шогышо пӱсӧ йодыш-влакымат решатлаш кеч-кунамат ямде. Сандене тудым чыланат – пашам пырля ыштыше йолташыже-влак, тунемше-влак, нунын ача-авашт пагалат.

А эше Татьяна Михайловна ушан ава, йӧратыше кова да ӱшанле йолташ улеш.

Ала-кунам писатель Симон Соловейчик туныктышо нерген тыге каласен: «Тудо артист, но тудым колыштшо ден тудым ончаш толшо-влак тудлан совым огыт кыре. Тудо – скульптор, но тудын пашажым нигӧ ок уж. Тудо – врач, но пациент-влак шагал годым тудлан таум ойлат. Кушеч вара тудлан кажне кечын вийым налаш? Шке деч веле». Нине шомак Кӧтерем кыдалаш школ директорлан лач келшен толеш.

Тений Татьяна Михайловна шкенжын 55 ияш юбилейжым палемда. Тек тыгаяк кодса – илышым йӧратыше, ончыко кайыше да пеленна мемнам вӱдышӧ. Таза, пиалан лийза.

Кӧтерем КШ-ын коллективше.