Мемнан ачана – Шаймарданов Роман Шаймардановичын паша биографийже энергетика дене кылдалтын

Тудо 1938 ий 7 июльышто Павасола ялыште колхозник-влак Шаймардан Надзиратилович ден Изидур Исадыковна Надзиратиловмыт ешыште шочын. Кум ияш улмыж годым шинчавӱд йӧре шке ачажым фронтыш ужытымыжым кызытат шарна. Тудо 1943 ийыште сусыргышо, кокымшо группан инвалид лийын мӧҥгыжӧ пӧртылын. Авана сар мийыме ныл ий жапыште озанлыкыште имне-влакым ончен.

1945 ийыште шым ияш эрге школыш тунемаш каен. Тудо арифметикым моткоч йӧратен. Шочмо ялыште шымияш школым тунем пытарыме деч вара Краснохолмский селаште шинчымашым поген. Совет жапыште кугырак класслаште план почеш тунемман лийын. Ачаже шарна, 8 классыште тунеммылан тудлан 140 теҥгем тӱлыман лийын. Тунем пытарыме деч вара изинекак кресаньык пашалан шӱмаҥше эрге ялысе специальностьым налаш лийын. 1955 ийыште Бирск олаште ялозанлык школышто тунемын. Мӱкшым ашныме да счетоводым ямдылыме шотышто талукаш курсым сай отметкылан гына тунем лектын. «Совет Армий» озанлыкын вуйлатышыже, коммунист Гайфуллин самырык специалистым куан дене вашлийын да мӱкшотарым вуйлатышылан шогалтен. Озанлыкыште 8 мӱкшотар, 764 мӱкш еш лийын. Ик мӱкшотар гыч гына 17 центнер дене мӱйым налыныт. Ты жапыштак тудым комсорглан сайленыт, партийыш пурен.

1950 ийын кокымшо пелыштыже Калтаса районышто электрофикаций тӱҥалын. Уфа ола гыч энергетик-влакын вуйлатымышт почеш калык ты сомылышто чолган участвоватлен. Ачамын шарнен ойлымыж гыч, нуно электроопорым шогалтеныт, электролинийым шупшыныт, Павасола, Васола, Калмиямучаш яллаште да чыла округышто колхоз радиом колтеныт. Тиде ончыкылык энергетикын икымше практический усталыкше лийын.1959 гыч 1962 ий марте Шаймарданов Роман Совет Армий радамыште служитлен. Электрик-влакым ямдылыме шотышто кок арняш курсым эртен да экзаменым кучен. Тудо Свердловск-45 олаште инженерно-технический войскан секретный ужашыштыже служитлен. Армийысе электрик-влак 10 кВ электропередачым обслуживатлен. Боевой да политямдылалтымашын отличникше, военный службышто шкенжым сай ончыктышо, ефрейтор Шаймарданов Роман частьын комсоргшо лийын.

Армий деч вара шочмо ялышкыже пӧртылын. Электрик лийын пашам ышташ тӱҥалын. Озанлык вуйлатыше Я.С. Федулов тудлан Белебейысе ялозанлык механизаций да электрофикаций шотышто техникумыш тунемаш пураш темлен. Армийыште службым эртымыж

1967 ийыште техникумым тунем лектын, дипломан специалист шочмо озанлыкыште умбакыже пашам ышташ тӱҥалеш. Вара Нефтекамскысе электросетьыш пашаш ӱжыныт. Калтаса районышто тулым пурташ кӱлын. Тунам тудын составышкыже Бурай да Краснокам район-влакат пуреныт. Обслуживатлыме территорий кугу лийын. Пашаш йӱдымат, кечывалымат, кеч-могай районыш ӱжыктен кертыныт. Связьым раций гоч кученыт. КПСС райкомын секретарьже К.Н. Галиуллин энергетик-влак дене чак пашам ыштен. Райсоветын председательже Н.А. Атнабаевлан кӧра электрик-влаклан ГАЗ-51 машина ден ДТ-75 тракторым ойыреныт. Трактор дене электромонтажный пашам шукташ вышкым оборудоватленыт.

Тыге РЭС-ын Краснохолмский участкыже пашам ышташ тӱҥалын. Роман Шаймарданович участкым вуйлатен. Йодмаш почеш районысо энергообъект-влакым обслуживатленыт. Уста специалистым паша деч кӱрылтде тунемше-влаклан шинчымашым пуаш йодыныт. Павасола кандашияш школышто электродело урокым эртараш тӱҥалыныт. Ялысе ӱдыр ден эрге-влак электрикым шымлаш тӱҥалыныт. Роман Шаймарданович кум ий нуным туныктен да шке шинчымашыжым пуаш тыршен.

1970 ий тӱҥалтыште Калтаса райрӱдыштӧ Сельхозэнерго пашам ышташ тӱҥалын. Р.Ш. Шаймарданов организацийым почмаштат тыршен. Сулен налме канышыш лекмыж марте электролабораторийым вуйлатен. Озанлыклаште, предприятийлаште, эмлымверлаште, школлаште да йочасадлаште энергобъект-влакым обслуживатленыт да йодмаш почеш пашам ыштеныт.

Тений ме ачанан 80 ияш юбилейжым палемдышна. «Мый пиалан айдеме улам, – еш альбомым, паша гыч пуымо грамота-влак ончышыла каласыш тудо. – Ӱмыр мучко тыршенам, чонлан келшыше пашам шуктенам. Паша биографием районышто элекрофикацийым ыштыме, вияҥдыме жап дене кылдалтын. Тидын дене моткоч кугешнем. Пелен тыгаяк чолга еҥ-влак тыршеныт. Икте-весылан кеч-кунамат полшаш ямде, ӱшанле еҥ-влак лийыныт. Самырык еҥ-влак, ял калык каҥашым, полышым йодын. Пашам пырля ыштыме йолташ, район мучко еҥ-влак дене мутланымаш кугу куатым ешареныт. Коммунист лийынам да кодынам».

Мемнан ачана пеҥгыде характеран, принципиальный еҥ лийын. Ялсоветын, икмыняр созывын райсоветын депутатше лийын. Кеч-могай тӱҥалтыште тудын пелен мемнан авана – Шаймарданова Идуся Шайхуловна лийын. Тений январь тылзын мемнан ешна ача-аванан пырля 55 ий келшен илыме юбийлежым палемдыш. Ме нунын ончылно вуйнам савена, йӧратена да пагалена.

Шокшын йӧратыме ачанам – Р.Ш. Шаймардановым, Калтаса сельхозэнергон ончыч пашам пырля ыштыме йолташыже-влакым, районысо энергетик-влакым профессиональ пайремышт дене саламлена. Нунын пашашт деч посна кызытсе айдемын илышыже шотдымо. Нунылан пеҥгыде тазалыкым, кужу ӱмырым, пашаште сеҥымашым, тыныслыкым, улан илышым тыланена.

Э. Тамиева,