Калтаса ужара
+21 °С
Пылан
Все новости
Новости
28 теле 2018, 12:29

2019 ий 1 январьыште мемнан районын пагалыме еҥже, Никольский Николай Николаевичлан 90 ий темеш ыле.

Николай Николаевич Мишкан районысо Рефанды ялыште шочын. Тӱҥалтыш школым тунем пытарымеке, сар тӱҥалын. Ачажым фронтыш налыныт. Умбакыже тунемаш йӧн лийын огыл, ешлан полшаш кӱлын, сандене Николай 12 ияшак почтальон лийын пашам ышташ тӱҥалеш. Похоронко-влак шуко толыныт, нуным поснак шалаташ йӧсӧ лийын, фронт гыч толшо серыш-влакым лудын.
Сар деч вара тудо кум ий жапыште шымияш школын программыжым тунем лектын да экстерн дене педучилищыш экзаменым сдаватлен да 1950 ийыште физике да математике туныктышын дипломжым налын.

1952 ий гыч Николай Николаевич шке илышыжым Калтаса дене кылден. Ончыч кыдалаш школышто физике ден математикым туныктен, 1956 ий гыч РОНО-то инструктор лийын, вара вуйлатыше. 1971 ий гыч – райсовет вуйлатышын алмаштышыже. 1974 гыч 1987 ий марте районысо калык контроль комитетын вуйлатышыже. Тыгодымак тудо мер пашаште чулымын участвоватлен: ик гана веле огыл район Совет депутатлан сайлалтын, КПСС райком бюрон членже лийын, сулен налме канышыш лекмекыже районысо ветеран-влакын ушемыштым вуйлатен. Кушто гына тудо пашам ыштен огыл, чыла вереат чын, пашам йӧратыше, поян шинчымаш дене ойыртемалтын. Пашам тыршен ыштымыжлан тудым «За доблестный труд в Великой Отечесивенной войне 1941-1945 гг.» медаль дене, кум гана БАССР Верховный Совет Президиумын, тыгак СССР калык контроль комитетын Чап грамотыжо-влак да «Ветеран труда» медаль дене палемденыт.
Ятыр ий районысо КПРФ организацийыште тыршен, ветеранмыт хорышто мурен.

Ватыже Маргарита Кутлубаевна дене кужу ӱмырым иленыт, кум икшывым ончен кугемденыт.

Николай Николаевич тений, 7 сентябрьыште, ош тӱня дене чеверласен. Тудым Калтаса селасе марий шӱгарлаште тойымо.
Ме, йолташыже-влак, тудым ӱмыр мучко шарнен илаш тӱҥалына.