Могай продуктым холодильникыште аралыман огыл

1. Консервым, коптитлыме кеч-могай кочкышым, вареньым холодильникыште аралаш ок темлалт. Нине продукт-влак верым арам гына айлаш тӱҥалыт, такшым гын тугакшат огыт локтылалт.

2. Пеҥгыде вожсаскам (пареҥгым, кешырым, шоганым) пленкыш вӱдылалын але пластик коробкыш пыштен аралыман, но холодильникыште кучыман огыл. Тушто писынрак локтылалтеш.

3. Помидорым, баклажаным, свежа киярым, кабачокым да лазыра кӧрган моло пакчасаскам холодильникыште аралаш огыт темлалт.

Нуно тунамак тамга дене леведалтыт, шемемаш тӱҥалыт. Баклажаным кужу жап аралынеда, а консервироватлаш жап ок сите, тунам пакчасаскам йыргешкын пӱчкеден, поҥго семын шӱртыш кередылын, юж сайын коштмо верыш кошташ сакаш лиеш. Телым тудым тамле пакчасаска рагум шолтымашке ешараш лиеш.

4. Кавун ден дынят холодильникыште кужун огыт аралалат. Этиленовый газым лукмылан кӧра дыньым, поснак пӱчмым, холодильникыште кучаш огеш кӱл. Шӱмыштыжӧ удыралтме, шемемаш тӱҥалме пале уке гын, кавуным, дыньым кухньысо шкафысе полкышто икмыняр тылзе але шошо мартеат аралаш лиеш. Тыгак олмам, грушым да виноградым юалге холодильникыш пышташ вашкыман огыл.

5. Тидымат эрелан шарнен кодман: мандариным, апельсиным, икманаш, тропикыште кушшо кеч-могай саскам холодильникыште ида кучо. Ӱлыкшӧ температуран верыште тыгай фрукт шӱяш тӱҥалеш да организмлан зияным ыштен кертше веществам луктеш. Садлан шуко налме цитрусым, гранат ден хурмам холодильникыште огыл, а, икмыняр лончын яндар кагазыш вӱдылын, пӧлемысе температуран кукшо верыште, мутлан, шкаф полкыш, кораҥдыман. Вет кӱын да чеверген шуктыдымо фрукт холодильникыште кийымыж дене шӱяш гына тӱҥалеш.

6. Холодильник кампет ден шоколадым аралыме вер огыл. Ӱлыкшӧ температурылан кӧра шере кочкыш ӱмбалан конденсат погына. «Сураҥше» шоколад эркын «кошка», а ӱмбалныже тыгыде кристалл-влак погынат. Тыге шоколадын тутло тамже йомеш.

Кампет гай кочкышым полиэтилен пакетеш пӱтыралын аралаш ок лий, конденсат шуко погынымо дене пунышкен локтылалтеш.

7. ӧрыктара гынат, оливе ӱй, мӱйым холодильникыште огыт арале: йӱштыштӧ кочкыш тутло тамжым йомдара, пайдале веществам вашке пытара.