У ийын икымше кечыжын Нуриев Вячеслав шке юбилейжым палемда

Нуриев Вячеслав Сафиевич 1959 ий 1 январьыште Кугу Тогыний ялыште шочын. Тӧлдӧ ялыште кыдалаш школым тунем пытарымыж деч вара Совет Армийыш налыныт. Усть-Илимскыште ракетный войскаште службым намиен. Служитлен толмекыже, комсомольский путевко дене Хабаровский крайыш Советский Гаваньыш каен. Тыште 1981 гыч 2007 ий марте колым кучышо флотышто моряк лийын пашам ыштен. Морякын пашаже неле да тидын годым лӱдыкшӧ. Туге гынат мемнан геройна тӱнян могай гына элыштыже лийын огыл. Совет жапыште колым кучышо шӱдылен судно-влак тӱнян теҥызше ден океаныштыже коштыныт. Вячеслав Сафиевич Америкысе (Аляска, Чили), Южный Корейысе, Китайысе, Японийысе, Сингапурысо, Индийысе, Новый Зеландийысе портовый олалаште, тыгак Ирландийыште да Кубаште лийын. Поснак Чили воктене кечывалвел серыште вӱд-влак шарнымашеш кодыныт. Тышке нунын суднышт ставридам кучаш толын. Тыште теҥызыште чӱчкыдын шторм-влак лийыныт, шотло минутышто лу этажан пӧрт кӱкшытан марте толкын-влак нӧлталалтыныт.

Икана Япон теҥызыште туткар лийын. Шторм годым нунын суднышт йӱлаш тӱҥалын да тулым нигузе йӧртен кертын огытыл. «SOS» сигналым икмыняр судно колын да лӱдде мемнам утараш пижыныт. Тунам мемнан деке голландский судно лишемын да шке бортышкыжо чыла морякым налын, Южнокорейский Пусан портыш намиен коден. Судно йӱлымӧ годым Южнокорейский вертолет барражироватлен. Моряк-влакым ырыктеныт, пукшеныт да шочмо элышкышт самолет дене колтеныт.

Сулен налме канышыш лекме деч вара мемнан ончычсо морякна шочмо-кушмо элышкыже пӧртылын. Тыште еш нерген шоналташ жап. Шӱм пелашыжым муын. Мемнан районышо кумдан палыме туныктышын ӱдыржӧ Гаязова Вероника Ивановнам марлан налын. Пелашыжат туныктышо улеш. Келшен, икте-весылан полшен илат, кок эргым ончен куштат. 10 ияш Максим ден 12 ияш Артем школышто тунемыт, ача ден аваштым куандарат.

Вячеслав Сафиевич шочмо элышкыже пӧртылмеке, могай эше тӱҥ пашам шуктен. Кузе ойла мемнан геройна, вигак КПРФ партийыш пурен. СССР –ште мый тугок пашам ыштенам, эмлалтынам, тӱням онченам. Партийлан кугу тау.

Мемнан геройна партийын пашажым лийже манын шукта. Ятыр ий сайлымаш комиссийыште пашам ышта. Шочмо кечыж деч ончыч Вячеслав Сафиевичлан пеҥгыде тазалыкым, еш пиалым да сай илышым тыланена.