12 январь – Россий Федераций прокуратурын пашаеҥже-влакын кечышт

Эртыше 2018 ийыште район территорийыште осал пашам ыштымаш 16,8 процентлан шагалемын. Кузе район прокурор И.Я. Ахметов увертарыш, тыгай результатлашке профилактике пашам намийымылан кӧра шуымо. Тиде пашам районысо правам аралыше орган ден верысе власть намиеныт.

Тӱҥ шотышто, неле осал паша шагалемын, пуштмаш лийын огыл, тыгак шолыштмаш, ДТП шагалемыныт. Моло осал пашам ыштымашат ятырлан шагалемын. Туге гынат, кодший наркотикым закондымын ужалымаш да тудын дене пайдаланымаш ятыр лийын.

Осал пашам ыштымаш шагалемын, туге гынат, тудым вожшыге кораҥдаш але эше ятыр пашам шуктыман. Законым шуктен толмо шотышто текшырыме пашам намийыме годым район прокуратура 605 нарушенийым пален налын, тудын почеш 156 протестым возымо. Судышко 85 иск йодмашым колтымо, законым пудыртышо-влак лӱмеш 209 представленийым лукмо, тушеч 154 вуйлатышым мут кучаш шогалтыме, адправам пудыртымылан 78 вуйлатышым мут кучаш шогалтыме.

Прокурор текшырымашым эртарыме деч вара кодший 4 уголовный пашам тарватыме. Иктыже – калыкым ондалкалыме шотышто. Краснохолмский селаште илыше пӧръеҥ пашашке пурымеке, кум тылзе жапыште пашадыме семын пашадарым налын шоген, тыге тудо закондымын бюджет гыч 12 тӱжем теҥге оксам налын. Кок уголовный пашам чодырам закондымын руымылан почмо да иктым – алиментым тӱлыдымылан.

Кодший тыгак район прокуратура кугыжаныш да муниципаль пого дене пайдаланыме годым, бюджет, тыгак сату ден услугым ончыктымо, йыр авырен шогышо пӱртӱсым аралыме шотышто законым пудыртымашым пален налын. Поснак закупко шотышто законым пудыртымылан кӧра кок ялсовет администраций вуйлатышым административно мут кучаш шогалтыме да нунылан 25 тӱжем теҥге штрафым пыштыме. Тыгак верысе самоуправлений органлаште йодмаш-влакым ончымо шотышто пудыртымаш-влакым муымо. Граждан-влакын йодмашыштлан вашмут-влакым пуымо огыл. Тиде пудыртымашлан кӧра район администрацийыште йодыш-влак дене пашам ыштыше да тидлан вуйын шогышо еҥ-влакым мут кучаш шогалтыме.

Район прокуратура паша кыл шотышто законым шуктен толмым тергенак шога. Эртыше ийыште паша договор деч посна пашашке налме икмыняр фактым пален налме. Прокурорын представленийже деч вара тиде ситыдымаш-влакым кораҥдыме.

Кугу пашам район прокуратура коррупций ваштареш кучедалме шотышто намия. Кодший, мутлан, взяткым налмылан да документ-влакым вашталтымылан кӧра райветстанцийын ончычсо вуйлатышыжлан 550 теҥге штрафым тӱлыкташ ыштеныт да эше кок ий вуйлатыме пашаште тудо ыштен ок керт. Тыгак полиций пашаеҥлан взяткым пуаш тӧчымашлан индивидуаль предпринимательлан 100 тӱжем теҥге штрафым тӱлаш ыштыктеныт. Тудо ийготыш шудымо икшывылан аракам ужален да тидлан мутым кучаш огыл манын, полиций пашаеҥлан взяткым пуынеже улмаш.

Прокуратурын ик тӱҥ пашаже – судышто уголовный паша-влак почеш кугыжаныш титаклымашым поддерживатлымаш. Кодший прокуратура пашаеҥ-влак 156 суд заседанийыште участвоватленыт. Суд деч вара 122 гражданиным мут кучаш шогалтыме, тушеч тӱрлӧ сроклан 19 еҥым эрык деч посна кодымо.

Прокуратура тыгак 64 гражданский пашам ончымаште участвоватлен да прокурорын заключенийже деч вара суд пунчалым луктын.

Кодший район прокуратурыш калык деч 143 йодмаш пурен. Тушеч 20-лан вашмутым пуымо. Йодмаш-влак тӱҥ шотышто паша да жилищный законым пудыртымаш, ЖКХ сфере дене кылдалтыныт улмаш. Кузе Ильдар Явдатович палемдыш, 2018 ийыште прокуратурыш йодмаш-влак шагалемыныт, тугеже законым пудыртен толмашат шагалемын.