87 ий мучко мемнан газет калыкым тӱрлӧ увер дене палыме ыштен шога

13 январьыште Российыште печать, СМИ пашаеҥ, журналист-влак шкеныштын профессиналь пайремыштым – Россий печать кечым – палемдат. Лач тиде кечын, 1703 ийыште Российыште Петр I кугыжан пунчалже почеш, «Ведомости» газетын икымше номерже лектын.

Мемнан район газетын икмыше номерже 1932 ийыште лектын. Тиддеч вара тудо шкенжын лудшыжо-влакым район илыш дене палдараш тӱҥалын. Тудын лӱмжат вашталтын: «Ленин корно», «Колхоз корно», «Ӱжара». Лач редакцийын задачыже гына вашталтдыме кодын – лудшына-влак дене ик илыш дене илаш, пашазе калык да курымашлык айдеме поянлык – паша, порылык, патриотизм нерген возаш.

Эше совет жапыштак редакций коллективын пашажым БАССР Верховный Совет Президиумжын Чап грамотыж дене акленыт. Пытартыш ийлаште редакций чӱчкыдын Россий, республике кӱкшытыштӧ эртарыме творческий конкурслаште участвоватла. 2006 ийыште мемнан газет республикысе район да олаласе газет-влак кокла гыч эн ончыч «Золотой фонд прессы России» знак дене палемдалтын. Тиде знак денак мемнан газетым 2011, 2012 да 2013 ийлаште палемденыт. А 2006 ий майыште, Москвасе Кремль дворецыште еш институтым арален да вияҥден толмылан «Семья России» общественный признанийын Национальный премийжын дипломжым кучыктымо. 2014 ийыште газет «Патриоты России» Всероссийский конкурсын «Служу Отечеству» номинацийыштыже район калык – Икымше тӱнямбал, Кугу Отечественный сарын участникше-влак нерген материал-влакым савыктымылан – лауреат лийын. 2015 ийыште газет верысе самоуправлений вияҥме шотышто пӱсӧ йодыш-влакым савыктен шогымыжлан республике конкурсышто икымше верым сеҥен налын.

2018 ийыште тыгак «Калтаса ӱжара» газет «Крепка семья, крепка нация» Федераль грантым сеҥен да федераль бюджет гыч окса полышым налын.

Пытартыш жапыште печать куштылго огыл илышым ила: газет-влакым тӱрлӧ электрон СМИ алмашта. Кугыжаныш казна «Россий почтылан» оксам ойырымым чарнымеке, газет-влаклан ак кӱзен каен. Туге гынат, мемнан пагалыме лудшына-влаклан кӧра тиражым кӱлеш кӱкшытыштӧ кучен сеҥенна. Вет обществе ден кугыжанышат иктым умылышаш улыт: газет ден журналым лудде ме шкенан мландынам уло кумылын огыл йӧраташ тунемына. Сандене, шерге лудшына-влак, умбакыжат ме тыланда ӱшанле йолташ лийын кодына манын, ӱшаныме шуэш.

Сандене мемнан пайрем дене тыйым, мемнан чумыр пайремна дене!