1 №-ан Краснохолмский кыдалаш школышто Фофанова Валентина Павловна кумло ий утла пашам ыштен

Шӱдылен тунемше-влаклан келге шинчымашым пуаш мыняр йӧратымаш, порылык, шинчымаш, паша кӱлын. Ме, пашам пырля ыштыме йолташыже-влак, тудын дене пашам ыштымына дене моткоч кугешнена.

Валентина Павловна – биологийым туныктымаште вӱдышӧ специалист, талантан туныктышо, чапле айдеме. Тудым школышто да районышто ушан-шотан туныктышо семын чыланат йӧратат да пагалат.

Тудо 1949 ий 9 январьыште Башкир АССР Калтаса районысо Кӧтерем селаште шочын. Кӧтерем кыдалаш школыш икымше классыш тунемаш каен. 1966 ийыште тудым тунем пытарыме деч вара тиде школыштак биолого-химический кабинетын лаборанткыже лийын пашам ышташ тӱҥалеш. 1967 ийыште Бирск оласе пединститутын биологий факультетышкыже заочно тунемаш пурен. 1972 ийыште институтым пытарыме деч вара 1 №-ан Краснохолмский кыдалаш школышто биологий ден химийым туныкташ тӱҥалеш.

Тыршен пашам ыштен, кугырак туныктышо-влак деч усталыкыштым чумырен, педагогика наукышто у сеҥымаш-влакым шымлен, вет кажне туныктышылан илыш дене иктӧр ошкылаш кӱлеш. Школышто пашам ышташ тӱҥалме икымше минутыштак коллективыш пурен кертын. Кеч-кунамат порын мутланышан, чулым, сай кумылан туныктышо лийын. Тудын паша принципше – кажне туныктышын моштымашыжым почаш, ӱшаным шочыкташ да шкем аклаш туныктымаш. Сандене кажне тунемшын вияҥмыжым шымлен, туныктен. Ий гыч ийыш тудын тунемшыж-влак районысо, республике олмпиадылаште да конкурслаште призан вер-влакым налыныт. Урок-влакат оҥайын, куштылгын эртеныт. Чыланат палат, Валентина Павловна – тиде чылалан сай пример, тудо урокын задачыжым чын шынден мошта, проблемым тунемше-влак дене каҥаша, уроклаште тӱрлӧ йӧным кучылтеш. Тудо самырык туныктышо-влаклан наставник, кугу пашаче, поро озавате улеш. Ятыр ий тыршен ыштымыжлан Валентина Павловна Башкортостан Республикын Почетан грамотыжо-влак дене палемдалтын, «Калык образованийын отличникше» знакше уло.

1 №-ан Краснохолмский кыдалаш школын коллективше.