Тогыний ял гыч мӱкшым ончышо Флюр Шаритдиновын мӱйжӧ Уфа калыкланат келшен

Декабрьыште, У ий деч ончыч, муниципаль образований-влакын «Башкортостанын историйже гыч странице-влак» фестиваль-марафон эртыме жапыште республикынан рӱдолаштыже мемнан районын презентацийже эртен.

Ме тидын нерген возенна ыле. Мероприятий кугу да шуко велан лийын, ик материалыште гына тудын нерген возашат ок лий. Сандене ме тендам тудын участникше-влак дене палыме ыштена. Тачысе ойлымашнан геройжо – Тогыний ял гыч мӱкшым ончышо Шаритдинов Флюр Михайлович. Мемнан районышто ыштен лукмо ялозанлык да промышленность сату выстакыште Шаритдиновын мӱкш сатужо воктене калык моткоч шуко погынен ыле. Пеледыш да писте мӱйым тамлен ончымеке, шукыжо Шаритдиновын мӱйжӧ бурзян мӱй дечат тамлырак манын ойлышт. Кажныжын, конешне, шке тамже, тидын дене от ӱчаше. Мыланна, тыгак мӱкш ончышылан шкаланже, тиде, конешне, моткоч куан увер, кунам тыйын сатум моктат, куаныде нигузе ок лий. Тыгак уфамыт Флюр Михайловичын моло сатужымат уло кумылын ончышт.

– Мӱкш-влак мӱйым гына пуат манын эре шоненам, а тыште..! – кидшым шаралтен ойла мероприятийын ик участникше. – Тыште мӱй деч посна эше прополис, перга да шуко молат…

– Мӱкш ятыр пайдале сатум пуа, – ойла Флюр Михайлович. – Но молан дыр мемнан дене мӱкшым ончышо шуко еҥ мӱйым гына кӱза, моло дене ок заниматлалт. Моло сатуланат йодмаш кугу. Кызыт чылажат уло. Ончыч лийын огыл. Индешлуымшо ийла мучаште, кок тӱжем ий тӱҥалтыште пазарыште прополис дене пергам ужаленыт, но налше лийын огыл. Варарак калык нуным эм семын кучылташ тӱҥалын. Поснак интернет мемнан илышыш шыҥен пурымылан кӧра нунылан йодмаш кугемын. Кызыт мыйын южо сату ужалаш огешат сите. Чыла налын пытарат.

Флюр Шаритдинов – мемнан районышто мӱкшым ончышо дипломан специалист улеш. Мӱкш-влак нерген тудо чыла огыл гынат, моло-влак деч шуко пала. Опытшат ситышын уло – кумло ий утла тудо мӱкшым онча. Тудын деке полышым йодын мӱкшым ончаш тӱҥалше-влак гына огыл, тыгак опытан-влакат толыт.

Кызыт Флюр Шаритдиновын мӱкш отарыштыже 100 утла мӱкш еш. Мӱкшым ончаш тудлан Алина ватыже, Андрей ден Артем эргыже-влак, Нэля ӱдыржӧ полшат. Икманаш, еш дене тыршат.

– Мӱйым ыштен лукташ куштылгырак, а теве ужалаш нелырак, – ойла Шаритдинов. – Тидын нерген тыланда кажне мӱкш ончышо каласен кертеш. Сандене ме мӱйым ужалыме вер-влакым Нефтекамск ола ден Краснохолмский селаште почаш лийынна.

Флюр Михайловичын сатужым вашке налын пытарат, тудо прилавкыште кужаш ок кие. Села калыкланат, оламытланат тудын сатужо келшен. Мӱйым гына огыл, тыгак моло сатумат кумылын налыт.