Ойлат, физически паша айдемым да тудын тазалыкшым пеҥгыдемда, илышыжым кужемда. Иванова Ефросинья Петровналан нине шомак лач келшен толеш

Тудо 1939 ий 20 январьыште Амчемучаш ялыште шочын. Ешыште вич йоча лийын, эн кугыжо – Ефросинья.

Ачажым, Паяшев Петрым, инвалид улмыжлан сарышке налын огытыл. Тудо ныл классым тунем лектын, вара бухгалтер-влак курсым. Сар жапыште счетовод, бухгалтер лийын тыршен.

Аваже, Измелык, Кокла Качмаш ял гыч. ™мыржӧ мучко колхозышто тыршен. 88 ияш ош тӱня дене чеверласен. Ефросинья Амчемучаш ялысе шымияш школым тунем лекмеке Чапаев лӱмеш колхозышто тыршаш тӱҥалын. 1976 ий марте ушкалым лӱштен.

Вара Амчемучаш кыдалаш школышто техничке лийын тыршаш тӱҥалын. Шке пашажым кумылын шуктен. Тыште тудо сулен налме канышыш лекмекыже тыршен.

1959 ийыште Иванов Евгенийлан марлан лектын. Нуно икте-весе дене келшен 48 ий иленыт, шым икшывым ончен кугемденыт.

Ирина ӱдырышт 1960 ийыште шочын. Тудо Йошкар-Олсе Н.К. Крупская лӱмеш кугыжаныш педагогика институтын филологий факультетшым тунем лектын. Нефтекамск олаште ила да библиотекарь лийын пашам ышта.

Алевтина ӱдыржӧ Нефтекамск олаште ила, сулен налме канышыште улеш.

Игорь эргыже Свердловск оласе Уральский политехнический институтым тунем лектын, инженер специальностьым налын, кызыт кугыжаныш предприятийыште тырша.

Юлия ӱдыржӧ Краснохолмский селасе «Вӱд канал да шокшо сетьыште» тырша.

Лилия ӱдыржӧ техникумым тунем лекмыж деч вара Нефтекамск олаште продавец лийын тырша.

Ольга ӱдыржӧ Бирск оласе кугыжаныш педагогика институтын филологий факультетшым тунем лектын, кызыт Нефтекамск олаште библиотекыште пашам ышта.

1970 ийыште Иванова Ефросиньям II-шо степенян, а 1978 ийыште I-ше степенян «Материнство» медаль дене палемденыт. Тудо пашан ветеранже улеш. Пашам йӧратыше, илышлан куанен илыше ӱдырамаш. 47 сотык пакчаштыже тӱрлӧ пакчасаскам ончен кушта.

Ушкалым куча, паранже дене пырля 14 шорыкшо, ятыр чывыже, 1 еш мӱкшыжӧ уло. Кажне кеҥежым 15 комбым налеш. Чыла вереат шуаш тырша.

™дыржӧ ден веҥыже-влак кажне каныш кечылан да отпусклан авашт деке толыт. Кеҥежым шудым, пуым ямдылаш полшат. А Ефросинья нунылан шылым, ӱйым, ӱмбалым, муным, паксасаскам йокма олмеш пуэн колта. Кова нунылан меж носким пидеш.

Ефросиньям 11 уныка да 5 кугезе уныкаже куандарат. Тудо чыла пала: кушто чодыраште але пасушто могай поҥго але емыж шочеш. Кеҥежым чыла деч ончыч кынелеш да чодыраш емыжым, поҥгым погаш кая.

Тудо спортым йӧрата, школышто тунеммыж годымак куржталын, тӱрлӧ таҥасымашлаште участвоватлен. Индеш ий илалше еҥ-влакын спартакиадыштышт участвоватла, шке ийготанже-влак коклаште эре икымше верым налеш. Художественный самодеятельностьышто чулымын участвоватла. Тудын куымо станокшо уло, тиде пашалан самырык ӱдыр-влакым туныкта. Районышто эртарыме пайремлаште участвоватлен да шке куымо паласыже-влакым ончыктен.

Уло кумылын ме тудлан пеҥгыде тазалыкым, пиалым, весела да куанле кече-влакым тыланен кодына.

В. Иванов.