Амчемучаш ялыште Шорыкйол пайремым эртареныт

Марий калыкын ик оҥай йӱлаже уло – тудым Шорыкйол маныт

Тиде пайремым, у ийыш тошкалмеке, январьыште палемдат.

Шорыкйол – марий калыкын ик эн кугу пайремже. Тудлан нуно ончылгочак ямдылалтыт. Чыла чер осалым яндар вӱд дене мушкын колташ манын, марий-влак ошыгечынже мончаш пурат, лум гай ош тӱсан ару тувыр-йолашым чият. Эрдене кынелын, озавате мелнам кӱэштеш, когыльым ямдыла, туарам кӱктен луктеш, шоҥешталтше пурам гын, ончылгочак шолта. Чыла кочкыш-сийым ямдылен шуктымеке, суртоза шке пӱтырымӧ шыште сортам чӱкта да Ош Кугу Юмо деч еш пиалым, тазалыкым, тӱрлӧ пӱртӱс зиян деч, осал тушман деч аралтышым йодеш. Тиде пайрем кечын кугу пашам ышташ тӱҥалман огыл. Йоча-влак «сокыр тагала» модыт, капеш шушо ӱдыр-каче-влак посна пӧртыш модаш, мурен-кушташ, жапым веселан эртараш, ончыкылык мужыраҥме нерген мужедаш погыненыт. Тыгодымак Васлий кува, Васлий кугыза семын чият да пӧрт еда коштыт. Ялысе суртыш пурымеке, могайрак кидпашам ыштымышт нерген йодыт, пашачыштым поро мут дене мокталтен кодат, йогыланаш йӧратышым пӱсӧ йылмышт дене почкалтарат. Ончыкылык идалык могай лийшаш нерген каласат. Суртоза толшо-влакым сайын пукшен-йӱкта, а уна-влак ваштарешыже сай сугыньым пуэн кодат. Тыге Шорыкйол ик раня пеш веселан да пайдалын эрта.

Тыгай марий йӱла-влак Амчемучаш ялыштат шукталт шогат. Кӱльтура пӧртыштӧ марла муро-влакым йоҥгалтарат, йоча жап гычак кандыра куштымашым кушташ туныктат. Илалше-влак пайрем годым, мотор марий тувырым чиен, гармоньын сылне семже почеш тавалтат. Тиде культура пӧртыштӧ, чыла эртарыме мероприятий-влак кӱкшын аклалтыт. Тушто Петраев Андрей Юрьевич да художественный вуйлатыше Ангелина Константиновна Шамыкаева пашам вияҥдат. Чыла пашам устан вӱден моштымыштлан кӧра пайрем-влак чаплын эртат.

Чынжымак, пытартыш жапыште калык культура пӧртыш корным мондаш тӱҥалын. Культура илыш деч ӧрдыжкӧ кораҥаш шотлан ок тол. Тунам айдемын чонжо йӧршын пӱнышка. Йорлештше чонан айдеме илыш деч вараш кодеш. Ме марий калыкнан историйжым, йӱлажым палышаш да пагалышаш, марий ылмынам йӧратен тунемшаш улына.

И. Исиметова ямдылен.

Фотом Амчемучаш СДК-н

сайтше гыч налме.