Районышто илыше калыклан у пӧртыш илаш куснаш социаль тӱла-влак полшат

Чын, пеш сай факт уло: Калтаса районышто илыше калык илыме верлан субсидийым налеш. Тыгай полышым кугыжаныш деч «Башкортостан Республикыште ялозанлык продукций, сырье да продовольствий рынкым регулироватлымаш да ялозанлыкым вияҥдымаш» кугыжаныш программын «Башкортостан Республикыште сельский территорийым вияҥдымаш» цельыш виктаралтше подпрограмме ончыкта. Тудо яллаште илыше, тидын годым самырык еш да специалист-влакын илыш условийыштым саемден колташ манын ышталтеш. Ты программе нерген мемнан газетланна район администрацийын экономике пӧлкажын тӱҥ специалистше, калык, самырык еш, самырык специалист-влакын йодмашыштым ончымо шотышто МР Калтас районысо координационный Советын секретарьже Аркадьева Евгения Васильевна каласкалыш.

– Чын, тиде тыге. Вет кунам самырык еҥ-влаклан уло кушто илаш, паша ышташ, икшыве-влакым кушташ – мом эше тыланыман? Тугеже селанат ончыкылыкшо уло.

Ныл ий жапыште – 2014 гыч 2018 ий марте – тиде программылан кӧра 53 еш шке илыш условийжым саемден кертын, тышеч 35 еш – районышто ялозанлык отрасльыште пашам ышта. Ты жапыште 5 тӱжем утла кватратный метр илыме верым чоҥымо. «Башкортостан Республикыште сельский территорийым вияҥдымаш» цельыш виктаралтше подпрограммым илышыш шыҥдараш Калтаса районлан 49,98 млн теҥге оксам бюджет гыч ойырымо.

– Программыште паша договор але агропромышленный комплексыште посна предпринимательский пашам намийыше 35 марте ийготан самырык еш да специалист-влак, тыгак илыме верыште пашам ыштыше 35 ий деч кугырак ийготан граждан-влак участвоватлен кертыт.

Тыгеракын, ялыште илыше, паша договор але посна предпринимательский пашам намийыше самырык еш да специалист-влак социаль тӱлам налын кертыт. Илыш условийым саемдаш кӱлмӧ нерген граждан-влакым илыме верыште ялсовет администраций признатла. Ты сомыл Россий Федераций Илыш кодексын 51-ше статьяжлан эҥертен ышталтеш.

Тылеч вара шке илыш условийыштым саемдаш тыланыше самырык еш да специалист-влак Калтаса район муниципаль район администрацийын экономике пӧлкашкыже (Калтаса села, К. Маркс урем, 72, 12 №-ан кабинет) палемдыме формо дене йодмашым возат.

Ындыжым кӧмыт тиде программыш пурталтын, нунылан увертарена. 2018 19 августысо Башкортостан Республике правительствын 451 №-ан пунчалже почеш икмыняр вашталтышым пуртымо. Башкортостан Республике муниципаль район бюджет-влаклан субсидийым ойырымо да шеледыме правилын 2.19 пунктышто тыгай вашталтышын пуртымо:

Башкортостан Республике муниципаль район администрацийыш Правилын 2.17 пунктшо почеш документ-влакым ик тылзе жапыште пуымо ок лий гын, Башкортостан Республике муниципаль район администраций тиде гражданиным программе гыч луктын кертеш.

А. Светлова ямдылен.