Фольклор коллектив-влак – калыкын йӱлажым аралыше-влак

Уфа олаште эртыше «Страницы истории Башкортостана» муниципаль образований-влакын фестиваль-марафон эртыме жапыште мемнан районын презентацийже годым ялла гыч шагал огыл фольклор коллектив миен ыле. Мемнан районышто илыше калык, тудын культурыжо, йӱлаже-влак нерген лач самодеятельный артист-влак гына сайын каласкален кертыт. Фольклор коллектив-влак деч сайын нигӧат калыкын самобытностьшым, тудын ойыртемжым каласкален ок керт.

Районышто илыше удмурт калыкын чапшым кок коллектив – Кӱшыл Тиктем СДК гыч «Ингур» калык фольклор-этнографий ансамбль да Кугу Качак СДК гыч «Зангари» фольклор ансамбль араленыт. Кок коллективат пеш сай выступатлен, калык нунылан совым рӱж кырен.

«Зангари» самодеятельный ансамбльын артистше-влак «Олыкышто» сценический представленийым ончыктеныт. Тыште калыкын шудым солымо жапым ужаш лийын. Шудым солымо дене пырля удмурт калык мурым, куштымашым ужаш лийын.

«Зангари» ансамбльлан «Калык коллектив» лӱмым кодший гына пуэныт. Ансамбльым эше 1996 ийыштак Кугу Качак СДК пелен ыштыме. Ансамбльым негызлыме кече гыч тӱҥалын тачысе кече марте тудым Тимирханова Ирина Валериевна вуйлата. Ансамбльын волгыдо да мондаш лийдыме номерже-влак кеч-могай мероприятийымат сӧрастарат. Ик гана веле огыл коллектив самодеятельный художественный творчество конкурслаште дипломант да призер лийын.