И. Палантай лӱмеш тӱвыра да сымыктыш колледжысе «Жар-птица» ансамбльыш коштшо ик чевер ӱдыр – Русалина Исламгалиева.

Ты ансамбльыш хоровой отделенийыште тунемше ӱдыр-рвезе-влак коштыт. Мотор лӱман Русалина тышке тунемаш Пошкырт кундем гыч толын. Шочмо ялже – Калтаса район Киябак ял. Тушто кызыт Эдита аваже, Радислав ачаже, Рузанна шӱжарже да Радим шольыжо илат. Роман изаже ешыж дене Нефтекамск олаште ила, а пашашке Краснохолмский селаште верланыше нефтепаркыш кудалыштеш.

«Мый изием годсек тиде колледжыште тунемаш шоненам, ынде теве кумшо курсышто улам, – каласкалаш тӱҥале Русалина. – Ачам 1985 ийыште тыштак хоровой отделенийыш тунемаш пурен. Но ик идалык эртымеке, тудым армийышке наҥгаеныт. Армий деч вара Йошкар-Олашке тунем пытараш шонен толын, но отделений петыралтын улмаш. Тунам Пошкырт кундемышке пӧртылын. Ачамын корныжым тошкем. Тудак мыйым индешымше класс деч вара олашке тунемаш пураш конден. Колледжым тунем пытараш мылам Юмо пӱрен, шонем».

Мураш Русалина йочаж годсек йӧратен. Ачаж ден кочаже гармонист лийыныт. А кокаже Римма Исламгалиева – палыме мурызо, Башкортостан Республикысе тӱвыран сулло пашаеҥже. Икымше гана изи Русалина (ачаж ден аваже тудым Русалочка, Русалинчик маныныт) сценышке шым ияш лектын. Шочмо ялыште эртаралтше Сабантуйышто Т. Денисован репертуарже гыч «Шарнымаш ломбо» мурым мурен.

Варажым районласе конкурслашке коштын. Икымше сеҥымашыже – 2008 ийыште Калтаса селаште «Весеняя капель» конкурсышто кокымшо вер. А кок ий гыч «Яндар йӱк» фестиваль-конкурсышто Гран-прим сеҥен налын. Тыгак Русалина эстрадный ансамбльышке коштын, тудын дене пырля тӱрлӧ конкурслаште участвоватлен.

2015-2016 ийлаште Пошкырт кундемыште мурызо-влак Олег Славин да Надин Р. Исламгалиевам пырля гастрольышко налыныт. Тушто Русалина калык муро да Марина Садован репертуарже гыч икмыняр сылнысем дене калыкым куандарен. А кызыт «Жар-птица» ансамбльын участницыже-влак марий, руш калык да авторский муро-влакым мурат.

Исламгалиевмыт ешыште чыла шочшыштлан Р буква дене тӱҥалше лӱм-влакым кычал муыныт. Русалина – тюрк лӱм, пиалан шӱдыр манмым ончыкта. Мотор сын-кунан ӱдырлан марий тӱняште пиалан шӱдыр лияш тыланен кодына.

«Кугарня» газет гыч налме.

Фото-влакым “ВКонтакте” гыч налме.