Айда-лийже шонымаш эҥгекыш шуктен кертеш

Тидлан кӧра пожар-влак лиедат да тушто калык кола, пого локтылалтеш. Кузе практика ончыкта, пожар лӱдыкшыдымылык шотышто правил-влакым шагал еҥ шуктен толеш.

Пӧрт кӧргыштак 40 литран газ баллоным шогалтат, а шукыж годым тудыжын редукторжо газым колта. Шуко годым пожар газ дене олтыдымо пӧртлаштат лиеда, но тыгодым илыме верым ырыкташ шке ыштыме ырыктыме прибор-влакым кучылтыт. Южгунам коҥга кӧргыштӧ шке ыштыме газ горелке-влакым вераҥдат. Шукыж годым пожар тӱз огыл электрооборудований, электроприбор дене пайдаланыме годым лиеш. Чаманаш веле кодеш, тыгак пожар мончаш олтымо годым коҥга тӱз огыл лиймылан кӧра чӱчкыдын лиеда.

Пожар профилактике шотышто Башкортостан Республикысе Тӱҥ управлений кажне ийын «Жилище» профилактике операцийым эртара. Калтаса район администраций «О созданиии комиссии для проведения проверок жилья семей, находящихся в социально-опасном положении и семей, находящихся в трудной жизненной ситуации» пунчалым луктын.

МЧС пашаеҥ-влак кажне кечын илыме верлаште профилактике рейд-влакым эртарат. Тыгодым калык дене мутланымашым, инструктажым эртарат, памятке ден листовко-влакым пуэдат, пожар годым могай экстренный службылашке йыҥгырташ телефон номер-влак дене палдарат.

Тыгак, районысо 11 ялсоветыште 2019 ий тӱҥалтыште пожар лӱдыкшыдымылык шотышто профилактике группо-влакым ыштыме.

Район калык деке тыгай йодмаш уло: пожар лӱдыкшыдымылык шотышто правил-влакым эре шуктенак шогыза. Шарныза, электрооборудованийым але коҥгам тӧрлашлан оксам чаманымаш, йӧрташ мондымо тамака, розеткыш чыкен кодымо да вара мондымо электроприбор пожар лӱдыкшым ыштат. Йочада-влакым шкетыштым пӧртеш ида кодо да пожар лӱдыкшыдымылык нерген нунылан ойленак шогыза. Чылаланат пожар извещательым шындаш йодам.

Тул пижме годым 01, 112 але 4-22-01, 4-21-01 номер дене йыҥгырыза да пожарный-влак толын шумо деч ончыч еҥ-влакым да погым йӱлышӧ пӧрт гыч лукташ тӱҥалза. Тулым йӧрташ да сусыргышо-влаклан икымше медполшым ончыкташ пижса.

Шарныза, пожарым йӧрташ огыл, а тудым ончылгоч кораҥдаш куштылгырак.

Н. Ганиев