- Мемнам колышт манын ойленна да мемнам колыныт, - Елена Фанавиевна Нурова, 2 №-ан Краснохолмский кыдалаш школ директор

– Моткоч кугу мероприятий лийын: форумышто 745 еҥ участвоватлен, тышеч 600-жо – образовательный организаций-влакын вуйлатышышт. Моткоч пӱсӧ проблеме-влакым каҥашымаште лач вуйлатыше, школ директор-влак погыненыт. Тыгак регион вуйлатыше Радий Хабиров икымше гана шке каҥашаш кӱлмӧ проблеме-влакым ойлен. Тудо тыгак каласен: «Мо дене те келшеда, а мо дене уке. Ала те иктаж-мом шке темледа?». Мый «Педагогическое сопровождение одаренный детей» дискуссионный площадкын пашаштыже участвоватлышым. Тыште модератор-влак образований, культура, самырык-влак дене пашам намийыме шотышто БР Кугыжаныш Погын – Курултай комитет вуйлатыше Р.М. Асадуллин, БР образованийым вияҥдыме интитутын ректоржо Г.Р. Шафикова мутланымашым намиеныт. Тушко школ директор-влак ушненыт да кажныже шке проблемыжым, тудым кузе кораҥдаш кӱлмӧ нерген ойлаш тыршен. Мемнам колышт манын ойленна да мемнам колыныт. Вара пӱсӧ йодыш-влакым пленарный погынымашын кокымшо ужашыштыже каҥашеныт. Мылам гын 2 №-ан Бурай кыдалаш школ директорын лектын ойлымыжо шӱмеш логале. Тудо образований пашаеҥ-влаклан коммуналь тӱла индексацийже нерген йодышым тарватен. Коммуналь услуга-влаклан ак кугем толеш, а 2011 ий гыч тиде льгота ик ганат индексироватлалтын огыл. Тыгак тудо йоча чотым налын тӱлаш темлен, вет тидын дене туныктышынат пашадарже кугемеш. Радий Фаритович кажне выступленийым тӱткын колыштын, чыла возен да финанс министерстве дене тиде йодышым тарватыме нерген мутым пуэн.

Форумышто ятыр инициативе лийын. Нунын кокла гыч ик эн каҥашыме – арняште вич кече тунеммашым пуртымаш. Мылам гын тиде шонымаш моткоч келшыш – мемнан школ тыгай форматыште пашам ышта, жапыштыже келшыше пунчалым лукмо. Форум паша тӱҥалтыште Радий Хабиров участник-влаклан ты инициативым темлен, а кокымшо пленарный ужаш тӱҥалме годым Радий Фаритович «вич кече тунеммашке» куснаш шӱден. Ты темым дискуссионный площадкыште каҥашыме годым, республикыште илыше калык ты нерген шке шонымашыжым ойлен: регион вуйлатыше «Вконтакте» лаштыкыштыже ты теме почеш йодыштмашым колтен. Шукыжо вич кече тунеммашке куснымо дене кӧнен.

Ты вашлиймаш деч вара эше иктым каласен кертам – тиде Радий Хабировын чын, сай да поро айдеме улмыжо. Каналтыме деч вара ме угыч залыште чумыргышна, а тудо каҥашымаш деч ончыч кочкынна ме але уке манын йодо. Форумын пашажым пеш сай организоватлыме. Мучаште тудо «Мыланем те кажныда мӧҥгышкыда сай да таза-эсен пӧртылмыда кӱлешан» манын каласен.