Моло-влакым туныктен – шке тунемыт

Кодшо арнян тиде конкурсым иктешлыме ыле. Тудым эртарыме жапыште ятыр туныктышо шке мастарлыкшым ончыктен. Тений тыште 1 №-ан Краснохолмский КШ-ын тӱҥалтыш класслаште туныктышо Н.В. Красноперова, Амчемучаш КШ-ын технологийым туныктышыжо Л.П. Нуриахметов, Киябак ООШ-н информатикым туныктышыжо Г.А. Нурисламова, 2 №-ан Калтаса КШ-ын биологийым туныктышо Н.Н. Ахунова да 1 №-ан Калтаса КШ-ын историй ден обществознанийым туныктышыжо Е.М. Ахметдинова.

Нуно шке профессийышкышт тӱрлӧ корно дене толыныт: иктыже изинекак туныктышо лияш шонен гын, весыже – еш династийым умбакыже шуя. Екатерина Ахметдиновалан туныктышо профессийым ойырен налаш тудын историй ден обществознанийым туныктышыжо-влак – Альберт Ринатович Ахмадуллин ден Наталья Рашидовна Кутлубаева полшеныт. Нунын урокышт моткоч оҥай лийын, сандене профессийым ойырен налаш жап шумеке, Екатерина шуко шоныде, туныктышын профессийжым ойырен налын.

Тудо Бирскысе социально-педагогика академийым тунем лектын да 1 №-ан Калтаса кыдалаш школышто тыршаш тӱҥалын. Екатерина Михайловна историйым – Шочмо элым йӧраташ туныктышо наука манын шона.

Екатерина Михайловна шым ий туныктышо лийын тырша. Тудын тунемшыже-влак тӱрлӧ улыт – кудымшо гыч латикымше классыште тунемше-влаклан тудо шинчымашым пуа. Икшыве-шамычым предметым тунемаш кумылаҥдымаш – туныктымаште икымше да эн кӱлешан тат. Туныктышын тунемшылан шинчымашым пуаш кумылжо уло гын, тудо тӱрлӧ йӧным, формым, приемым кучылтын тунемшылан садыгак сай шинчымашым пуа. Эше туныктымаште ик эн кӱлешан йӧн – тунемше-влакым шкаланышт ӱшанаш туныктыман. Тидым ышташ эн ондак тунемышлан ӱшаныман, тудлан чыла йӧратымашым, шке шӱм шокшым пуыман, а эн тӱҥжӧ тудын дене чын лийман.

Туныктышын профессийже посна койыш-шоктышым йодеш. Жап йодмашлан келшен толаш, неле задаче-влакым решатлаш кӱлеш да чыла пытарыме вий тунемше-влакын сеҥымашышт дене пӧртылеш манын, ӱшанымат йомдарыман огыл. Кӱчыкын каласаш гын, Екатерина Михайловнан кредожо – моло-влакым туныктен, шкежат тунем, эре ончыко кае. Тӱня эре вашталтеш, ончыко кая, сандене туныктышат тидлан келшен толшаш.

Квалификацийым кӱкшемдымаш, тӱрлӧ конкурс-влак Екатерина Михайловналан умбакыже вияҥаш йӧным ыштат. «Идалыкын туныктышыжо» конкурсышто сеҥымаш тудын шке профессийжым чын ойырен налмыже да тудым йӧратымыже нерген раш ойла. «Школышто пашам ышташ куштылго огыл», – каласыш Екатерина Михайловна, «Визитке» конкурс мучаште. – Туге гынат, мый школым йӧратем. Эрдене – йоча йӱк дене эркын темшым, кечывалым – йӱкан да веселам, кастене – нойышым, но сай кумыланым. Мый школ гыч пытартыш каяш йӧратем. Тулым йӧртем да эрдене мый адакат тышке толам да йоча-влаклан шинчымашым пуаш тӱҥалам манме шонымаш кумылым нӧлта да ырыкта».