Келтей кыдалаш школын выпускникше-влак шочмо кундемышкышт пӧртылыныт

Келтей кыдалаш школын кум выпускникше кӱшыл тунемме заведенийлаште шинчымашым погымеке, шке шочмо ялыштышт туныктышо лийын тыршат. Нуно наукым, шке профессийыштым йӧраташ туныктышо шке наставникыштын пашаштым умбакыже шуят.

Дарья Евгеньевна Линючева Уфа олаште Акмулла лӱмеш БГПУ-ын йот йылме-влак факультетым тунем пытарен да англичан да француз йылме-влакым туныктышо специальностьым налын, Келтей школышто француз йылмым туныкта. Пытартышыжым Дарья Евгеньевна шонен ойырен налын, тудлан англичан йылмым школышто шукертак тудын туныктышыжо Валентина Гиндулловна Хайдаршина шӱмаҥден.

– Мый университетыште тунеммем годым француз йылмым йӧратен шынденам, – ойла Дарья Линючева. – Тудо моторын йоҥга. Сандене мыйын тунемшем-влак, кузе мыйым Валентина Гиндулловна йот йылмылан шӱмаҥден, нуным шымлаш тӱҥалышт да кумыл шуын урокышт коштышт манын тыршем.

Бирск оласе педагогика академийым – БашГу-ын филиалже, Михаил Вячеславович Ижболдин ден Людмила Рифовна Ислаева тунем лектыныт.

Михаил Вячеславович шочмо школыштыжо технологийым туныкта, а Людмила Рифовна – тӱҥалтыш класслаште тунемше-влаклан шинчымашым пуа.

Самырык туныктышо-влаклан кугырак коллегышт-влакат полшенак шогат, каҥашым пуат.

– Мемнан выпускникна-влак педагогика вузыш тунемаш пурымышт да шке шочмо школышкышт дипломированный специалист семын пӧртылмыштлан моткоч куаненна, – ойла Келтей кыдалаш школын директоржо Раиса Абдулловна Нагимова. – Шке велым ме нунылан полшаш тыршена. Нуно диплом деч ончычат тыште практикым эртеныт. Мемнан выпускникна-влак туныктышо профессийым ойырен налмыштлан – тиде нунын туныктышыштын надырышт. Тугеже наукым йӧраташ туныктеныт, шкешт деке йӧратымашым, пагалымашым сулен налыныт. Мый мемнан школышто виян туныктышо-влак пашам ыштат манын пеҥгыдын каласен кертам. Мутлан, англичан йылмым туныктышо Валентина Гиндулловна Хайдаршинам налына. Кызыт тудын тунемшыже Дарья Евгеньевна Линючева туныктышо лийын пашам ышта. Мемнан кок выпукникна – Анастасия Шамиева ден Анастасия Пекинина Екатеринбург олаште Уральский кугыжаныш университетыште лингвистика факультетыште переводчиклан тунемыт. Пекинина школым тунем пытарымыж годым, англичан йылме дене ЕГЭ дене 85 баллым поген, а Шамиева – 89. Тиде туныктышын пашажын результатше.

Келтей ял шке эргыж ден ӱдыржӧ-влак дене кугешнен кертеш. Ятыр чапле пашаеҥым, шанчыеҥым, спортсменым ончен куштен. Тыште верысе школынат, туныктышо-влакынат надырышт уло. Сандене туныктышо-влак самырык тукымлан сай шинчымашым пуаш манын шкешт деч шогышым чылажымат ышташ тыршат.