«Йочан шинчымашыже пенгыде шинчымаш деч шога», - тыгерак шотла Актыган школын туныктышыжо И.К. Ивашкин

Илыш шыже, пӱртӱсысӧ шыже семынак шӱлыкан шонымаш-влакым шочыкта. Вет рвезе годым ончыкыжо мо лиеш от шоно. Тыгак, очыни, Йошкар-Оласе совхоз-техникумын самырык выпускникше-влакат шонен огытыл. Техник-механик специальностьым налше Ивашкин Ильят ончыкылан планым чоҥен. Совет армий радамыш кайымыж деч ончыч Марий Эл Республикысе «Суртовский» совхозышто пашам ыштен.

Илья службым ГДР-те, автомобильный войскаште эртен. Демобилизаций деч вара Марий кугыжаныш педагогика институтын индустриально-педагогика факультетышкыже тунемаш пурен. Весела студент жап писын эртен каен. Самырык специалист институтым отличий дене тунем лектын, трудым туныктышо специальностьым налын да шочмо кундемышкыже пӧртылын. 1985 ийыште Актыган школышто тыршаш тӱҥалын ды кызыт мартеат йоча-влак пелен улеш. Кажне кечын шинчалан койдымо подвигым ышта – йоча-шамычлан шинчымашым да нунылан шкенжым шӱм шокшыжым пуа. Тунемшым тудо предмет деке шӱмаҥден мошта. Илья Камаевич 33 ий Актыган школышто тырша. Математикым, физикым, технологийым, ИЗО-м туныктен. Ятыр ий воспитательный паша шотышто директорын алмаштышыже лийын. «Самоделкин» кружокым вӱда, тыште йоча-шамыч шуко уым пален налыт. Пӧртлан кӱлеш инструмент-влакым шке ямдылат: межым шӱдыраш шӱдырым, кольмым да шуко молымат. Кружоклаште ямдылыме поделке дене тӱрлӧ изделий-влакым школ мероприятий-влакым эртарыме годым сеҥыше-влаклан приз шотеш пуат, ача-ава-влаклан пӧлеклат. Йоча-влаклан шӱдыр семын лийше да порылан да чынлан туныктышо, айдеме лияш полшышо туныктышым вашлияш кугу пиал. Тудо тунемше-влакым тӱрлӧ конкурс, акцийлаште участвоватлаш кумылаҥден кертын. Йоча-шамыч технологий дене районышто, республикыште эртарыме тӱрлӧ конкурслаште участвоватлат да ончыл верлам налыт.

Илья Камаевичат шкенжын шинчымашыжым кӱкшемденак шога. 2018 ийыште «Марла чын возена» всеобщий диктантым возен. Тудын портфолиоштыжо район администрацийын Чап грамотыжо ятыр уло. 2013 ийыште РФ-се образований да науко министерство И.К. Ивашкиным Чап грамото дене палемден.

Шӱм-чон поянлык, шке пашажым йӧратымаш да тудым пагалымаш, виш улмаш да илышым йӧратымаш – тиде койыш-влак дене Илья Камаевич пашам пырля ыштыме йолташыже-влакымат палдара. Таче тудо шке выпускникше-влак дене кугешна. Нуно сай туныктышо, киндым ончен куштышо, механизатор, ушкалым лӱштышӧ, культура пашаеҥ лийыныт.

Илышын кеч-могай жапыштыжат еш эн шерге. Ватыже, Светлана Тимирхановна дене, тудо ятыр ий марий йылме ден литературым туныктен, Марий кугыжаныш педагогика институтышто тунеммышт годым палыме лийыныт. Ивашкинмыт ныл икшывым ончен кугемденыт. Ольга аваж дене ачаж семынак туныктышо лийын, кызыт Нефтекамск оласе 2 №-ан КШ-то математикым туныкта. Анна ден Мария медициныште тыршат. Дмитрий эргышт Сарапул оласе машиностроительный техникумым тунем лекмекыже, вахте йӧн дене геофизик лийын тырша. БГУ-н Бирск филиалыштыже инженер-геологлан тунемеш.

Ынде пиалан кова ден коча икшыве-влакын сеҥымашыштлан гына огыл, уныка-шамычынланат куанат. Пиалан еҥ улеш, кӧм Илья Камаевич Ивашкин – шке пашажым сай палыше туныктышо – туныктен.

Актыган ООШ-н коллективше.