Фельдшер Евгений Шамаев ныл ял гыч калыкым обслуживатла

Самырык фельдшер Евгений Шамаев Сылвий ялысе фельдшер-акушер пунктым вуйлата. Тудо тиде ялым гына огыл, тыгак Калегин ялсоветыш пурышо эше кум ялым – Кушнам, Акынийым, Моркым – обслуживатла. Чылаже тыште 250 еҥ ила.

Евгений шкеже Калмаш ялыште шочын. Кок ий ончыч Бирск оласе медико-фармацевтический колледжым тунем лектын, акушер специальностьым налын. Чынжым каласаш гын, тудо тиде сомылым ик ганат шуктен огыл, вет азам ава-влак эмлымверыште шочыктышаш улыт. А ялысе фельдшер тудлан чыла велымат полышым ончыктен шогышаш улеш. Аза шочмеке, йочан тазалыкшым текшырышаш.

– Яллаште тӱҥ шотышто илалше еҥ ден пенсионер-влак илат, – каласкала Евгений. – Сандене нунын шукыж годым кӱкшӧ давлений, шӱм, сустав-влак корштат. Ийготлан кӧра шукыжо ФАП-шке толын огеш керт. Вес ялла гыч ойлыманат огыл. Сандене шкаланем кошташ верештеш. Кече еда черле 20 еҥ деке мием. Кызыт мыйын патронажыштем 15 еҥ, а эше кажне гана вес адрес-влак дене йодмаш-влакат лийыт. Поснак кызыт, кылмен черланыме да грипп озаланыме жапыште.

Вес адрес – тиде вес ял-влак. Нуно Сылвий ял деч кок-кум километр тораште верланеныт. Лумым, йӱштым, пораным да йӱрым шотыш налде, черле-влак деке Шамаев вашка. Йӧра эше машина логалеш гын, но шукыж годым йолын каяш логалеш. Пӱрымашлан Евгений ок ӧкынӧ. «Тыгай пашам ойырен налынам гын, чытыман» – шыргыжалын ойла тудо.