Кунам паша творчество марте кушкеш

Кузе сай туныктышо лияш? Кузе тиде профессийыште сеҥымашлашке шуаш? Нине йодышлан «Идалыкын туныктышыжо» район конкурсын участникше-влак вашмутым пуат.

Тений конкурсышто вич школ гыч туныктышо-влак участвоватленыт: 1 №-ан Краснохолмский КШ-н тӱҥалтыш класслаштыже туныктышо Наталья Валерьевна Красноперова, Амчемучаш КШ-н технологийым туныктышыжо Леонард Павлович Нуриахметов, Киябак ООШ-н информатикым туныктышыжо Глуса Альфитовна Нурисламова, 2 №-ан Калтаса КШ-н биологийым туныктышыжо Наталья Николаевна Ахунова да 1 №-ан Калтаса КШ-н историй ден обществознанийым туныктышыжо Екатерина Михайловна Ахметдинова. Конкурсант-влакын паша стажышт шымыт гыч коло ий марте.

– Тиде тыглай таҥасымаш огыл, тиде эше профессиональ мастарлык тошкалтышым ик ошкыллан кӱшкӧ кӱзымаш, – каласыш шке саламмутыштыжо район администраций вуйлатыше Ю.М. Садыров. – Тачысе конкурсант-влак тыгак сеҥеныт, вет нуно сценышке лектыныт – шкеныштым да шке мастарлыкыштым ончыкташ.

Тиде гана «Идалыкын туныктышыжо» район конкурс Краснохолмский селасе «Нефтяник» Культура пӧртыштӧ эртен. Залыште шинчыше-влак шкаланышт мом-гынат уым муын кертыныт. Конкурс кок этап дене эртен: икымшыште виш урок, методике семинар-влакым эртареныт, интернет-ресурсым ямдыленыт да эссем возеныт.

Занятий-влакым палыдыме класслаште эртареныт гынат, чылажат кӱкшӧ уровеньыште эртен. Финалышке туныктышо-влак мыняр гынат баллым поген лектыныт. Кеч конкурсант-влак ончылно икгай цель ден задаче-влакым шындыме лийын гынат, кажныже шке корныжым ойырен налын. Вес семынже, очыни, лийынат ок керт, вет кызытсе туныктышо-влак творческий, креативный улыт. Чыла тидым нуно финалыште ончыктеныт. Йӱла почеш эн ончыч шкем палдарымаш лийын.

Туныктышо-влак, тӱрлӧ йӧным кучылтын шкешт нерген каласкаленыт: кузе профессийыш толыныт, кузе пашаштат да ешыштат, тыгак мер илышыштат чыла вере шуаш тыршат, яра жапыште мом ыштат – чыла тидым нуно слайд, видеоролик полшымо дене каласкаленыт. Эн сай визитке Екатерина Ахметдинован ыле манам гын, йоҥылыш ом лий, докан.

Конкурс участник-влак шке предметыштым сай палымыштым гына огыл ончыктен кертыныт, тыгак нуно кеч-могай аудиторийым туныктен сеҥат. Тидым мастер-класслаште чыланат ужыныт. 15 минут жапыште кажне туныктышо шке предметше дене могай пайдале йӧн-влакым кучылтмыж нерген каласкален. Наталья Красноперова меж, войлок гыч могай сӱрет-влакым ышташ лийме нерген каласкален. Леонард Нуриахметовын тунемшыже-влак фанере гыч мотор салфетнице-влакым пӱчкеденыт. Глуса Нурисламова чыламат веб-дизайнер лийын ончаш темлен да шке сайтым ышташ туныктен. Наталья Ахунова могай лӱдыкшым арака конден кертме нерген каласкален. Екатерина Ахметдинован мастер-классше айдемын типологийжылан лӱмдалтын лийын: айдеме-сюрприз, айдеме-правило, айдеме-кыл, айдеме-доминант.

Пытартыш конкурс «Фейерверк увлечений» манылтын. Чыла номер тыште моткоч волгыдо, сылне лийын. Наталья Красноперовалан движений – тиде илыш, тудын йӧратыме увлеченийже – куштымаш. Екатерина Ахметдиноват кушташ йӧрата: пашам пырля ыштыме йолташыже-влак дене пырля хореографий композицийым ямдылен ыле. Наталья Ахунова сӱрет-влакым тӱрлаш, путешествоватлаш, коньки дене кошташ да кушташ йӧрата. Леонард Нуриахметовын мурыжо шӱм-чонеш логалше лийын. Эше ик мурым – башкир йылме дене Глуса Нурисламова шергылтарен. Тудлан «Ватан» обществын ансамбльже полшен.

Конкурс-влак мучашке лишемыныт. Жюри балл-влакым шотлымо жапыште, ончаш толшо калык ден уна-влаклан самырык артист-влак – тӱрлӧ конкурслаште сеҥыше-влак: Дарья Шумкова, Богдана Шумкова, Елена Мазитова, Анастасия Файзуллина, Елена Клеветова, «Фантазия» коллектив – концерт номер-влакым ямдыленыт ыле.

Вучымо жап – иктешлымаш, номинант-влакым, сеҥышым палемдыме тат толын шуын. «Мастер своего дела» номинацийыште Нуриахметов Леонард Павлович палемдалтын. «Учитель-воспитатель детской души» номинацийыште – Ахунова Наталья Николаевна, «Молодость и талант» номинацийыште – Наталья Валерьевна Красноперова, «Сердце отдаю детям» номинацийыште – Нурисламова Глуса Альфитовна. «Идалыкын туныктышыжо» конкурсышто Ахметдинова Екатерина Михайловна сеҥен.

Чыла конкурсант-влак районысо образований пӧлка да профушем деч дипломым, призым, пӧлекым налыныт. Нуным пашам пырля ыштыме йолташышт, ялсовет администраций гыч шокшын саламленыт.

Пайрем мучашке лишемын – туныктышо-влакын кажне кечын шуктымо неле пашаштлан изирак пӧлек. Конкурсант-влакын сеҥымашышт – тиде школ коллектив-влакын сеҥымашышт, сандене районысо чыла школ коллективым «Идалыкын туныктышыжо» конкурс мучашке лишемме дене саламлыме шуэш.