Вера Александровна Касьянова Арлан нефтепроводной управленийыште кумло вич ий тырша

Мемнан шонымаште, нефть отрасльыште виян пӧръеҥ-влак гына пашам ыштат. Вет паша тушто куштылго огыл. Туге гынат тушто ӱдырамаш-влакат пашам ыштат. «Транснефть-Урал» АО-н Арлан нефтепроводной управленийын «Чернушка» товарный нефтеперекачивающий станцийын операторжо Вера Александровна Касьянова уло илышыжым нефть отрасльлан пӧлеклен.

Вера Александровна 1964 ий 29 январьыште Пермь областьсе Чернушка районысо Верхний Козьмяш ялыште шуко икшыван ешыште шочын. Александр Степанович ден Валентина Васильевна сар жапысе икшыве-влак тукым гыч улыт. Изинекак нуно колхозышто тыршаш тӱҥалыныт, киндым ончен-кушташ полшеныт. Кажныжын пашам ыштыме стажше 40 ий утла, сандене нунылан «Пашан ветеранже» лӱмым пуэныт. Нуно шке икшывыштымат изинекак пашам йӧраташ туныктеныт. Вера, ешыште кеч эн изи лийын гынат, тудат моло йоча-влак семынак пашам ыштен. Ялыште кеч изижат, кеч кугыжат паша деч посна шинчен огыл, кажнылан могай-гынат паша лектын.

Школ деч вара Вера Александровна Чернушка оласе училищыш повар-технологлан тунемаш пурен. Ик ий шке специальностьшо дене тыршен, вара пидме фабрикыш пашашке куснен. Чыла тиде шкем, шке илыш корным кычалме жап лийын. Вера Александровна икшывыже ден уныкаже-влакым тутло деч тутло кочкыш дене сийла, нунылан шокшо носким, пижым да свитерым пидеш.

1984 ий июньышто Вера Александровна Арлан нефтепроводной управленийын «Чернушка» НПС-ке товарный операторлан пашашке пура. Кызыт мартеат тушто пашам ышта. Вера Александровна «Чернушка» НПС-те нефтьым качатлымылан, тудым арален кодымылан да тудын качествыжлан вуйын шога. Резервуар ден нефтепроводлаште нефтепродукт-влак дене мо лийын шогымым текшыра. Паша неле да вуйын шогыман. Но шке пашажым тудо моткоч сай пала да шукта. Вет тыште тудо 35 ий утла тырша.

Вера Александровнан илышыже пиалан. Пашажымат тудо йӧрата. Пашам ыштыме предприятийжат тудлан келша.

– Тиде предприятийыште мый ӱмырем мучко пашам ыштем манам гынат, йоҥылыш ом лий, очыни, – ойла тудо. – Икшыве-шамычым ончен кушташ полшен, неле илыш ситуацийыште полшен. Тудо мыйын кокымшо суртышкем савырнен.

Вера Александровна сай специалист гына огыл, тыгак йӧратыше ава да кова улеш. Александр эргыж дене Татьяна ӱдыржӧ шукертак кугемыныт да шке ешышт дене Пермь олаште илат да пашам ыштат. Икшыве-шамычым ончен кугемдат. Кунам унала икшыве ден уныка-шамыч толыт, Касьяновмыт ешыште тиде событий кугу пайремыш савырна.