Мемнан подъезд, пӧрт да оралте-влак

Вич ий жапыште нуно мотор да сӧрал лийыт, нуным палашат ок лий, докан

Кузе да могай окса дене тиде планым илышыш шыҥдараш тӱҥалыт – шуко пачеран пӧрт-влакын муниципаль форумыштыжо ойленыт.

Форумым почшыжла, район администраций вуйлатыше Ю.М. Садыров шуко пачеран пӧртлаште подъезд-влакым олмыкташлан республикысе власть куд миллиард теҥге оксам ойырен манын палемдыш. Тиде окса дене икмыняр ий жапыште 26 тӱжем подъездым олмыкташ тӱҥалыт, тений – ныл тӱжемым.

Колтымо квота дене келшышын, мемнан районышто 2019 ийыште шуко пачеран 13 пӧртыштӧ 28 подъездым олмыкташ тӱҥалыт. Кодшо 122 подъездым вич ий жапыште олмыктымо лиеш.

Вич ий жапыште, район вуйлатышын мутшо почеш, чыла подъездым олмыктен шукташ лиеш.

Тендан пӧрт подъездам кунам олмыкташ тӱҥалмым пален налашлан, район администрацийын официаль сайтышкыже пурен пален налын кертыда.

Тиде йодышланат вуйлатыше тичмаш вашмутым пуыш.

Кузе Юрий Минзарипович палемдыш, тыгай паша-влак шукталташ тӱҥалыт: козырекым шогалтат, омсам кӱртньылан вашталтат, код суравочым шындат, тамбур омса-влакым вашталтат да молат.

Кӱвароҥа-влакым олмыктат: икымше пачашыште кӱвароҥам плитка дене леведыт; тошкалтышлаште стяжке-влакым шогалтат.

– пырдыжым штукатуритлат да чыла пачашыште водоэмульсионный чия дене чиялтат.

Тошкалтыш: кӱртньӧ ограждений-влакым тӧрлатат да чиялтат, тошкалтыш-влакым олмыктат.

Кӱртньӧ деталь-влакым (ограждений, решотка, пуч, ырыктыме прибор) чиялтат да т.м.

Светильник-влакым энергийым аралыше лампе-влаклан алмаштат, провода-влакым электротехнический плинтус ден кабель-каналлашке шупшаш тӱҥалыт.

– тӧрза блок-влакым ПВХ блок-влаклан вашталташ тӱҥалыт; откос-влакым штукатуритлат да чиялтат да т.м.

Тошто почто яшлык-влакым улан вашталташ тӱҥалыт. Панель тӱсым пӧртыштӧ илыше-влак шке ойырен налыт.

Программым БР-се региональный операторлан кӧра илышыш шыҥдараш тӱҥалыт.

Тидлан республике бюджет гыч 3,2 млн теҥге оксам ойырымо, а район тидлан 362,6 тӱжем теҥгем ойырен. Ик подъездым олмыкташлан 129,5 тӱжем теҥге кӱлеш.

Шуко пачеран пӧрт-влакым олмыктымо шотышто пашам чумыр погым капитально олмыктымо шотышто рабочий комиссий ӱмбак пыштыме. Комиссий член-влакын составышт ешаралтын, тушко райсовет депутат Б.Г. Галиаскаров ден шуко пачеран пӧрт ушемын вуйлатышыже О.И. Чикиревам (Калтаса села) да О.А. Сюткинам (Кӧтерем села) пуртымо.

2017 ийыште мемнан республикысе ола ден икмыняр районлаште «Формирование комфортной среды» программе пашам ышташ тӱҥалын. Эртыше 2018 ийыште мемнан районат тиде программыш ушнен.

Тыге, программе дене келшышын, Краснохолмский селаште пӧрт воктене 4 оралтысе территорийыш асфальтым шарыме. Тиде программылан республике 8,7 млн теҥгем ойырен.

Тений тиде программыш эше кум кугу оралте ушнаш шона – Калтаса села (Карл Маркс уремысе 86, 88, 90, 92 пӧрт-влак, Горький уремысе 15,17 да Ленин уремысе 7 №-ан пӧрт).

Краснохолмский селаште (Ленин урем, 11,13, 15, Лазарев урем, 4, 6, 6а пӧрт-влак) – 6,5 млн теҥгем ойырымо.

Кӧтерем села (Нефтяниковмыт урем, 1а, 3а, Северный урем 1, 3 пӧрт-влак) – 2,1 млн теҥге оксам ойырымо.

Тиде окса дене корнылаш асфальтым шарат, парковко верлам тӱзатат, теҥгыл дене урна-влакым шогалтат, йоча да спорт площадке-влакым лӱдыкшыдымылык резине прокрытий дене ыштат. Кузе правительстве погынымаште республике вуйлатышын пашажым шуктен шогышо Радий Хабиров увертарыш, тыгай резине покрытий дене чыла йоча ден спорт площадке-влакым ышташ тӱҥалыт, нунын деч посна подрядчик-влаклан документым огыт подписатле. Кузе Ю.М. Садыров каласыш, тидлан республике 16,3 млн теҥе оксам ойыраш шона.

Краснохолмский селасе Сеҥымаш парк ден Калтаса селаште йоча площадке

Тыгак тений Краснохолмский селаште Сеҥымаш паркым да Калтаса селаште РУС зданий ончылсо площадкым тӱзаташ шонат. Тидын нергенат Ю.М. Садыров ойлен.

РУС зданий ончылно йоча модмо площадкым, теҥгылым ышташ, урна-влакым шогалташ шонат. Тидлан республике 12,0 млн теҥге оксам ойырен. Тудлан могай лӱмым пуаш – калыклан шонаш темлыме.

Правительстве каҥашымаште республике вуйлатышын пашажым шуктен шогышо Радий Хабиров уремлаште волгалтарымаш дене кылдалтше йодышым кораҥдаш йодо.

2019 ий 16 январьыште Башкортостан Республике Правительствын каҥашымаштыже, тудым республике вуйлатышын пашажым шуктен шогышо Радий Хабиров вӱден, республике бюджет гыч муниципаль район-влаклан тиде мероприятийыш ушнашлан субсидийым ойырымо порядкым пеҥгыдемдыме.

Мемнан районлан республике бюджет гыч 3,7 млн теҥгем ойыраш шонат, верысе бюджет гыч – 368,2 тӱжем теҥгем.

– Тидын дене 258 светильникым, 21 опорым, 12 км СНП линийым налаш шонена, – каласыш Юрий Садыров.

2019 ий 1 январь гыч мемнан элна пеҥгыде коммуналь отход-влакым кучылтмо шотышто у системыш куснен. Тиде темымат Юрий Минзарипович ойырен коден огыл.

Реформын тӱҥ цельже: сортировко комплекслаште шӱкшакым сайлаш тӱҥалыт, кызыт кажне ялла воктене манаш лиеш шӱкшакым кышкыме вер-влак ятыр улыт, тидымат пытараш манын, очыни, тиде реформым тӱҥалме.

Башкортостан Республике Правительствын пунчалже дене келшышын, республике территорийым 5 зоналан пайлыме. Кажне зонышто региональный операторым палемдыме. Мемнан район территорийыште тиде – «Дюртюлимелиовдстрой» ООО. Регоператор шӱкшакым пога, наҥгая, обрабатыватла, тоя.

2018 ий 1 январь гыч шуко пачеран пӧртлаште илыше чыла еҥ, тыгак предприятий ден организаций, индивидуаль предприниматель-влак закон почеш региональ оператор дене договорым ыштышаш улыт.

Ончыч шӱкшакым тендан илыме вер гыч наҥгаен огытыл гын, икманаш ялыште илыше калык 1 еҥлан 35 теҥегем тӱлаш тӱҥалеш. Моло-влаклан – 70 теҥге.

Тачысе кечылан мемнан районысо 75 ялла ден селалаште 424 контейнерым шогалтыме.

Мучаште Юрий Минзарипович калсыш: – Мемнан тӱҥ задачына – калыкын илыме йӧнжым саемдаш. Тидым калыкын полышыж деч посна шукташ ок лий. Икоян команде лийын веле ме шонымо планнам шуктен кертына.