90 ияш Антонида Ивановна Моккеева тыгак илышым да пашам йӧратен ила

Братовщина ялыште, а тудыжо Гарейка эҥерын мотор серже воктене верланен, латкок пӧртыштӧ 45 еҥ ила. Нунын кокла гыч 10-жо – тунемше-влак, тунемаш эше коштдымо кум йоча да 10 пенсионер. Ялыште эн кугу еҥ – Мокеева Антонида Ивановна, 2019 ий 18 февральыште 90 ий темын. 90 ияш улеш гынат, тугаяк чулым, оптимист, илышым йӧратышан еҥ улеш.

Кугу ӱстел йыр чыла шочшо чумырген: икшыве-влак ешышт дене, уныка, кугезе уныка-влак. Тудын лӱмеш ятыр поро тыланымаш ден саламлымашым каласеныт. А ме, ялыште илыше калык, Антонида Ивановнам, юбилейже дене саламлена, тазалыкым, пиалым, тыныс шоҥгылыкым да чыла порым гына тыланена.

Поро йӱла почеш тиде чапле дате дене тудым Тошто Ял ялсовет вуйлатыше Г.В. Матвеев, ветеранмыт организаций вуйлатыше Н.А. Тимирбаева саламлаш толыныт. Унамыт тудлан пеҥгыде тазалыкым, лишыл шочшо-влак деч порым ужаш тыланышт да Россий Федераций президент Владимир Путин лӱм дене шарнымашеш кодшо пӧлек ден саламлымашым кучыктышт.

Антонида Ивановна сулен налме канышыш лекмыж марте доярке лийын пашам ыштен. Тудын пашажым Чап грамота, таум каласыман серыш-влак дене палемденыт. Тудо пашан ветеранже улеш.

А.И. Мокееван илыш корныжат куштылго лийын огыл. Самырык ийлаште колхозышто ушкалым лӱштен. Марлан лектын, Алексей пелашыж дене пырля Дектярск олашке пашам ышташ каеныт. Оласе илышлан чыланат огыл тунем шуыт. Сандене нунат шочмо ялышкышт пӧртылаш лийыныт. Пелашыже колхозышто пашам ышташ тӱҥалын. Еш пиал кужу лийын огыл. Тудын пелашыже ош тӱня дене эр чеверласен, ватыжым кум икшыве дене коден. Икшыве-влакым куштен, туныктен. Эргыже ӱдырым налын, ӱдыр-влак марлан лектыныт. Ындыжым тудо икшыве, уныка-влаклан куанен ила. Кугырак уныкаже шке коважлан чыла шотыштат йӧнан у пӧртым чоҥен. Тудо «ИТС–АГРО» ООО-ын директоржо Попов Михаил Леонидович улеш.

Антонида Ивановна лудаш йӧрата, газет ден журнал-влакым серыкта. Кидпашалан мастар улеш, икшыве ден уныка-влаклан пидеш. Кызыт ӱдырышт-влакат мастар улыт.

Кеҥежым Антонида Ивановнан пакчаштыже пеледыш-влак пеледыт, теплицыште помидор ден кияр кӱыт, йыраҥыште шоган, кешыр, йошкарушмен кушкыт. Чыланат авашт, ковашт да кугезе ковашт деке толыт. Тудым чыланат йӧратат.

Тоня кокайлан пеҥгыде тазалыкым, кужу ӱмырым да илышлан куанен илаш тыланена.

А. Артамонова.