Кажне пациент деке посна кылым муын моштымаш – Краснохолмский селасе эмлымверын врач-влак тыгай принцип почеш пашам ыштат

Краснохолмский селасе здравоохраненийын историйже 1952 ий, тыглай медицине пункт гыч тӱҥалын. 1953 ийыште икымше участковый эмлымверым чоҥымо, тӱҥ врач тунам Денисов Александр Кузьмич лийын, тудо тыште 1961 ий марте пашам ыштен, тудак икымше операционный блокым организоватлен.

1961-1962 ийлаште эмлымверын тӱҥ врачше лийын Хамидуллин Мухамат Хамидуллович тыршен. Варажым тудо Башкир АССР здравоохранений министрын алмаштышыже лийын.

1962 гыч 1967 ий марте эмлымверын тӱҥ врачше лийын Камалов Сави Задаевич ыштен, варажым тудо Краснокам районышто тыршен, тыгак Хаеров Карл Мухараямович, варажым тудо Бирскыште шуко ий пашам ыштен. Краснохолмский селасе здравоохраненийыш кугу надырым тыгак Ахматханов Фаик Ахматханович пыштен, тудо 1967 гыч 1974 ий марте тӱҥ врач лийын тыршен. Тудын годым типовой эмлымверым чоҥаш тӱҥалыныт. Здравоохраненийын отличникше да Башкортостан Республикын сулло врачше улеш. 1975 гыч 1980 ийла, 1987 гыч 2006 ий марте тӱҥ врач лийын Яруллин Риф Насруллинович ыштен. Тудо эмлымверын материально-технический базыжым пеҥгыдемдашлан шуко вийжым пыштен. Тудын годым 1976 ийыште эмлыме корпус-влакым чоҥен пытареныт. 2001 ийыште 60 койкылан у терапий корпусым чоҥымо. Р.Н. Яруллин здравоохраненийын отличникше, Башкортостан Республикын сулло врачше улеш.

1980 ий гыч 1987 ий марте Краснохолмский селасе эмлымверым Нафиков Рафаэль Фидаевич вуйлатен, вара тудо ятыр ий Октябрьский олаште тыршен.

2007 гыч 2010 ий марте эмлымверын тӱҥ врачше лийын Хабиров Халиль Ахнафович тыршен. 1982 ий гыч тудо врач-хирург лийын тырша. Башкортостан Республикын сулло врачше улеш.

Вашке полыш пӧлкам 1976 ийыште ыштыме. Тидын деч ончыч вызов-влакым постовой мудшӱжар-влак приниматленыт.

Краснохолмский эмлымвер пашам ыштыме жапыштыже шке статусшым икмыняр гана вашталтен: участковый эмлымвер, Краснохолский УБР МЧС, Краснохолмский оласе эмлымвер, Калтаса районысо Краснохолмский эмлымвер, 2010 ий гыч – Калтаса ЦРБ-ын амбулаторно-поликлинический подразделенийже.

Краснохолмский эмлымверыште ятыр профессионал тыршен: Кадырова Люция Хабибьянова, йоча врач, врач-инфекционист, акушер-гинеколог да невропатолог. БАССР-ын сулло врачше улеш. Шуко вийым, шинчымашым калыклан врачебный участкын врачше, республикысе здравоохраненийын отличникше-влак пуэныт: Ульданова Раиса Агзамовна, Иликаев Иван Ислибаевич, Хабирова Зайнаб Султановна, Бишарова Вера Николаевна, Гильмалетдинова Фагиля Мухаметовна, Давлетова Алсу Фагимовна, мемнан ветеранна-влак – Яруллина Анисия Абзаловна, Гараева Фируза Габдулхановна, Ахматгареева Раиля Фаргатовна.

Шуко ий мемнан эмлымверыште Гайнцева Римма Гилимовна, Самигулов Мавлетян Васильевич, Билалова Лилия Фаиковна, Набиуллина Земфира Мухарямовна, Сафин Рустем Минисламович пашам ыштат.

Статьяште тыгак кокла да изирак обслуживающий персонал-влакым каласыме огыл. Нуно врач ден вуйлатыше-влакын лишыл да ӱшанле полышкалышышт улыт. Нуныланат кугу таум каласыме шуэш.

Таче Краснохолмский эмлымверыште 92 еҥ тырша. Калыклан медицине полышым 16 врач, 52 медшӱжар, 14 еҥ изирак медперсонал да 8 еҥ обслуживающий персонал ончыкта.

Участковый эмлымверым почмо годым 15 койко вер лийын гын, 1960 ий тӱҥалтыште – 25, 1960 ий мучаште – 50 койко вер. 1976 ийыште у зданийым почмеке, 100 вер лийын (терапий, йоча, хирургий, гинекологий, акушер, оториноларингологий пӧлка-влаклан). Тачысе кечылан 10 койко вер уло.

Поликлиникыште 5 терапий да 3 педиатрий участке, 2 стоматолог, хирург-влак, оториноларинголог, ӱдырамаш консультаций приемым намият. Рентген, флюорографий кабинет, клинический да биохимический лабораторий, физиотерапий, массаж, процедур, смотровой, медпрофилактике, электрокардиографий, медстатистике кабинет-влак, йоча да кугыеҥ регистратура пашам ыштат.

Краснохолмский врач участкын специалистше-влак районысо здравоохраненийыш изи огыл надырым пыштат, кажныже шке пашажым сай палымыжлан кӧра калыклан тазылыкым жапыштыже пӧртылташ полша.

Х. Хабиров.