60 ий ик кече семын – йӧратымаште да келшен илымаште

Лач тыге каласаш лиеш вате-марий Саттаровмыт нерген. Нуно шукерте огыл бриллиант сӱаным палемденыт

Пиалан еш илышым кужу жап илен лекташ, икшыве-шамычым ончен кугемдаш, тыгодымак йӧратымашым да пагалымашым арален кодаш, кажнылан пӱрен огыл. Кузе ойлат, чын пиал оксаште огыл, тудо – шӱм-чон шокшышто, икте-весым йӧратымаште да пагалымаште.

Краснохолмский села гыч Саттаровмытын еш историйышт моло еш-влакын гаяк. Нуно ешым 1950 ийыште чумыреныт. Сар деч вара илыш неле лийын.

– Тиде шукерте лийын, мый шкеже Калтаса районысо Нарат ялыште шочынам, – каласкала Халида Сафовна. – Йорлын иленна, сандене мый пашам ышташ Пермь областьыш каенам, чоҥымо организацийыште штукатур-маляр лийын тыршенам. Туштак шке пӱрымашемым вашлийынам.

Нуриахмет Сабурович армий деч вара служитлен толшо самырык рвезе, тудо Шаран район гыч лийын, тиде организацийыштак тракторист лийын пашам ыштен. Тыге Пермь мландыште Башкирийын кок шочшыжо вашлийыныт. Вашлийыныт да тиддеч вара ойырлен огытыл.

– Тудо мыланем пеш келшен шинче, – шуя умбакыже Нуриахмет Сабурович, – ик жап гыч тудын дене ешым чумыраш шонымемым каласышым, Халида тидын дене келшыш. Никахым лудын кертше ковам муынна, вара ешнам регистрироватлышна.

Теве тыге, эре пырля, пӧртыштӧ ма, але пашаште Саттаровмыт илаш тӱҥалыныт. Пӧрт, зданий-влакым чоҥеныт. Чыла сай, но шӱм-чон садак шочмо кундемыш шупшын. Вате-марий Башкирийыш, Краснохолмский, нефтяникмыт поселкыш пӧртылаш лийыныт. Вет тыште Халидан кугурак акаже илен.

Нуриахмет Сабурович УТТ-ке трактористлан пашашке пурен. Тудо тыште сулен налме канышыш лекмекыже тыршен. Халида Сафовна верысе чоҥымо организацийыште маляр-штукатур лийын тыршен.

Ий-влак шиждегече эртен каеныт, икшыве-шамыч – эрге ден кок ӱдыр кугемыныт, ача-ава нунылан сай шинчымашым пуаш тыршеныт, пашам йӧраташ туныктеныт.

Саттаровмыт – уныка ден кугезе уныка-влаклан пример улыт. Еш нунылан тӱҥ поянлык.

Мыняр ий пырля илыме, а йӧратымаш ден пагалымаш садак кодыныт. Нуно икте-весыштым ик мут гычак огыл, а ик ончалтыш гычак умылат.

– Еш илышыштын секретышт, нунын поро улмашышт. Авана пеш чытышан да ушан ӱдырамаш улеш, – каласыш мыланем Луиза ӱдырышт.

Поро, чын улмаш, икте-весым умылымаш, икте-весе верч тыршымаш – чыла тиде Саттаровмытын еш поянлыкышт.

Юбиляр-влакым Калтаса районысо ЗАГС пӧлка вуйлатыше И.В. Валеева саламлыш да нунылан шарнен илаш пӧлекым да республике вуйлатышын пашажым шуктен шогышо Радий Хабиров деч саламлымашым кучыктыш. Тыгак нуным Краснохолмский ялсовет администраций вуйлатышын алмаштышыже Д.Ф. Шакиров саламлыш.

С. Аркадьева.