Хамидуллинмыт ешыште 7 врач да 4 кокла медпашаеҥ

Тиде чапле династий 60 ий ончыч шочын, тунам фельдшер Мулламухамет Хамидуллович Хамидуллин шке паша корныжым Калтаса районышто тӱҥалын. Тудо Уфа оласе медицине университетыш тунемаш пурен, 1961 ийыште врач-хирург специальностьым налын тунем пытарен. Икымше кок ий Краснохолмский эмлымверыште тӱҥ врач лийын тыршен, а 1962 ий мучаште да 1971 ийыште – Калтаса районын тӱҥ врачше. Тудын пашам тыршен ыштымыжлан, сай вуйлатыше улмыжлан кӧра Кӧтерем да Краснохолмский эмлымвер-влак, терапий корпус да Калтаса селаште поликлинике почылтыныт. 10 фельдер-акушер пункт пашам ышташ тӱҥалын. Трахома ден туберкулезым пытарыме шотышто кугу пашам шуктымо. Профессионал мастарлык да вуйлатышын талантше ий гыч ийыш тыршен ыштыме пашаште пеҥгыдемдалтын.

Ту жапыште Калтаса районышто 320 койкан эмлымвер, 6 участковый эмлымвер, 7 аптеке, 66 фельдшер пункт пашам ыштеныт. Здравоохранений системыште чылаже 600 медпашаеҥ тыршен, тидын годым 26 врач да 325 кокла медпашаеҥ.

Мулламухамет Хамидуллович кӱкшӧ классан профессионал, уста вуйлатыше лийын, пашаеҥ-влак дене мутланен, нуным идей да план-влак дене кумылаҥден моштен, поро мут дене полшен. Тудо ӱмыржӧ мучко шке пашажлан ӱшанле лийын. 1971 ий гыч сулен налме канышыш лекмыж марте Башкортостан Республике здравоохранений министрын алмаштышыже лийын пашам ыштен. Республикыште тыршен ыштымыжлан да сеҥымашлашке шуымыжлан Мулламухамет Хамидуллович «Знак почета» медаль-влак дене палемдалтын, «СССР здравоохраненийын отличникше», «БР-ын сулло врачше» лӱмым пуымо.

Мулламухамет Хамидулловичын ӱмыр пелашыже Разия Бикмухаметовнат медицине сферыште тыршен – врач-фтизиатр лийын.

Ӱдыржӧ Рафиса Мулламухаметовна – БГМУ кардиологий да функциональный диагностика кафедрын доцентше. Медицине наука кандидатын 40 ий утла паша стажше уло.

Тукым шольыжо Хамидуллин Разиф Мулланурович Калтаса селасе рӱдӧ эмлымверыште хирург, хирургий пӧлка вуйлатыше, медицине ужаш шотышто тӱҥ врачын алмаштышыже лийын пашам ыштен. Кызыт Нефтекамск оласе эмлымверыште хирургий пӧлкаште врач ординатор лийын тырша. Кӱкшӧ профессионалан, шке пашажлан вуйын шогышан врач. Тыге маныт тудын нерген пациентше-влак.

Тудын ӱдыржӧ Альфия Разифовна врач профессийым ойырен налын. 2007 ий гыч Уфа олаште врач терапевт лийын пашам ышта.

Тукым шольыжо Хамидуллин Мансур Мулланурович Калтаса ЦРБ-ште 1983-2017 ийлаште врач невролог, участковый терапевт лийын тыршен. Пашам пырля ыштыме йолташыже да калык коклаште пагалымаш дене пайдаланен.

Медицине династий – тиде лишыл родо-шочшо-влак ончылно веле огыл, тыгак шӱдӧ еҥ ончылно вуйын шогымо паша, полышым ончыктымо пашам умбакыже шуйымаш.

Р. Хамидуллин,