Цифр телевиденийым кузе чӱкташ?

Ме ик гана веле огыл увертаренна ыле, 3 июнь гыч аналог телевидений ончыктымыжым чарна. Чыланат цифр телевиденийыш куснена.

Тачат мемнан регионышто илыше калык 20 федеральный телеканалым цифр телевидений дене ончен кертеш, шукышт ончат.

Цифрыш куснымо годым кӧн, кабельный, спутниковый да IP телевидений гын, нуныланат тургыжланыман огыл – чыла пашам оператор-влак шукташ тӱҥалыт. Уремыште шогышо але пӧлемыште шындыме антене дене телесигналым приниматылше еҥ-влак гына тиде йодыш дене тӱкнен кертыт. Кузе вара нунылан цифр телевиденийыш куснаш? Тендан телевизорда у гын, тудым настроитлаш гына кӱлеш. Тошто гын – цифр приставкым налын установитлаш кӱлеш. Приставке-влакым кевытлаште да «Россий» почто» пӧлкалаште налаш лиеш. Мут толмашеш каласен кодена, приставкым ончылгоч налын ямдылаш кӱлеш. 3 июнь гыч, кузе моло регион-влакын опытышт гыч коеш, приставкылан ак ятырлан кӱзен кертеш. Але Удмуртий семын, приставкым ужалыме кевытлаште нуно огыт лий.

Те шке телевизор дене приставкым настроитлен огыда керт гын, РТРС-ке 8-800-220-20-02 номер дене йыҥгыртен чыла уверым пален налын кертыда (тугок йыҥгыртыман, нуно йӱд-кече пашам ыштат) але ялсовет администрацийыш полышым йодын миен кертыда. Районышто 38 волонтер пашам ышта, нуным лӱмын туныктеныт. Нуно мӧҥгышкыда миен телевизор ден приставкыдам настроитлен кертыт.

Кок категорий граждан-влак – шагал парышан еш ден пенсионер-влак, кудышт федеральный социальный тӱлам налыт, приставкылан компенсацийым налын кертыт. Оксам тӱлат, кӧ приставкым тений, 2019 ийыште налын. Оксам налашлан районысо соцзащитыш але МФЦ-ке йодын мийыман.

Кугыжаныш полышым налме шотышто 8-800-347-00-55 номер дене йыҥгыртен йодын кертыда.

Тачысе кечылан мемнан районысо яллаште цифр телевиденийым чӱктымӧ шотышто паша кузерак кая вара? Тидын шотышто Тӧлдӧ ялсоветым ончалына.

– Мемнан ялсоветыште 5 ял. Шуко еҥ цифр телевиденийын сигналжым приниматлаш тӱҥалын, – каласкала администраций пашаеҥ Юлия Сапегина. – Тошто Орьямучаште 20 еш цифр телевидений деке подключатлалтын огыл, У Орьямучаште – 10, Тӧлдыштӧ – 12, Тогынийыште – 5, Васильевкыште – 2.

Тӱҥ шотышто тиде пенсионер-влак. Нунылан ныл аналоговый каналат сита. Але икшывышт-влакын приставкым кондымыштым вучат. А самырык еш-влак, кунам цифр телевидений толын гына лектын, вигак подключатлаш тӱҥалыныт. Приставке-влакым настроитлаш волонтер-влак полшат. Тошто Орьямучаш, У Орьямучаш, Васильевке яллам Юрий Петров ден Валерий Ионов обслуживатлат, Тогыний ялым Владислав Николаев. Нуно лӱмын тидлан тунемыныт. Чынжым каласаш гын, йодмаш шуко уке. Калык чыла шке ышта. Тошто ден У Орьямучаш яллаште южо уремыште цифр телевидений сигналым огеш кучо. Сандене тушто спутник антенным шындаш перна. Льгота категорийыш пурышо кум еҥ спутник антенным шындашлан йодмашым возен. Но тыгай антенным шындыше оператор-влак эше толын огытыл. Ме нуным вучена.