50 ий пырля – кугу пиал да кугу паша

Тыге шотлат Изи Качак ял гыч вате-марий Давлетбай Тимирбаевич ден Райфа Байтимировна Насыровмыт

Кузе калыкыште ойлат: ешым чумыраш йӧсӧ огыл, йӧсӧ тудым арален кодаш. Чыла еҥынат тыге миен ок лек. Икте-весым умлышо, пагалыше да йӧратыше еҥ-влак веле кужу жап пырля илен кертыт. Лач ик тыгай еш нерген ме тыланда каласкалынена.

Шоналташ веле, теве 50 ий утла Изи Качак ял гыч вате-марий Насыровмыт ваш келшен да икте-весым йӧратен, пагален илат.

– Пырля 50 ий шукыжо илен ок керт. А ме тидым ыштен кертынна, – ойла шке ешыже нерген Давлетбай Тимирбаевич Насиров.

Вате-марий Давлетбай Тимирбаевич ден Райфа Байтимировна Насыровмыт пырля 53 ий илат. 1966 ий гыч, а официально мужыраҥыныт 1969 ийыште. Коктынат школышто тыршеныт: Давлетбай Тимирбаевич – туныктышо лийын, Райфа Байтимировна – пионервожатый. Чумыр педагогика стажышт кок еҥлан – 46 ий.

Сулен налме канышыш лекмыж марте Давлетбай Тимирбаевич Кугу Качак школышто тыршен, а Райфа Байтимировна – Изи Качак тӱҥалтыш школышто. Школышто тыршыме стажше Давлетбай Тимирбаевич Насыровын – 35 ий. 1962 ий гыч тудо Бурай ден Янаул районласе школлаште тыршен. 1966 ий февраль гыч Агытан кандашияш школышто, вара тудым Кугу Качак кыдалаш школыш кусареныт, тушто тудо 2002 ий марте ыштен. Ик жаплан Давлетбай Тимирбаевичым Кугу Качак ялсовет вуйлатышылан сайленыт лийын. Пашам тыршен ыштымыжлан тудым ятыр награде дене палемденыт, пашан ветеранже улеш.

Райфа Байтимировна – ӧрыктарыше ӱдырамаш. Сулен налме канышыш лекмекыже Изи Качак школышто икшыве-влакым возаш, шотлаш, лудаш туныктен. Ял калык тудым пагала, а ончычсо тунемшыже-влак тудым йӧратат да огыт мондо.

Тудо чыла пашаланат мастар улеш: пидеш, урга, тӱрла. Унам вашлияш йӧрата, поро ӱдырамаш улеш. Пӧртыштыжат да оралтыштыжат тудын кеч-кунамат ару, кеҥеж гыч шыже марте йырваш пеледыш пеледеш.

Вате-марий Насыровмыт кок ӱдырым – Эльвира ден Элеонорам ончен кугемденыт. Изирак ӱдырышт, 11 классыште тунеммыж годым черланымеке, илыш дене чеверласа. Эльвира Краснохолмский селасе эмлымверыште физиотерапевт лийын тырша. Нунын кок уныкашт – Илья ден Оля – уло.

– Кунам икшывына ден уныкана-влакым ужына, моткоч куанена. Нуно мыланна кугу пиал улыт, – ойлат Насыровмыт.

Нуно Изи Качак ялыште посна сурт дене илат. Сурт вольыкым, мӱкшым ончат, пакчасаскам куштат. Давлетбай Тимирбаевич мер илышыште, художественный самодеятельностьышто кумылын участвоватла. Изи Качак ял калык нунын деч примерым налын ила.

Илышыште чылажат лийын. Икте-весым умылымаш, чытымаш 50 ий пырля илаш йӧным ыштеныт, очыни.

Шӧртньӧ сӱан – тиде кужу илыш, ятыр ий пырля ыштыме куштылго огыл пашан саскаже.

Д. Асанова.