Келтей ялыште шочшо художникым сӱретлаш пӱртӱс кумылаҥден

Ӱмаште декабрьыште Пошкырт кундемыш «Чолман» газетын пайремышкыже миенна ыле. Тунамак Нефтекамск оласе ик тӱвыра полатын фойештыже сӱрет выставкым ончышна. Кажне сӱрет могай-гынат кумылым шочыкта, шонымаш ала-кушко торашке наҥгая. Эсогыл изи ойлымашат шочеш. Шонымашем кӱрлын, выставкын авторжым шинчам дене кычалаш пижым. ӧрдыжтӧ икмарда капкылан, изиш аптыраныше рвезым ужым. Тиде – Роман Ислаев.

Роман Калтаса районысо Келтей ялыште шочын. Кызыт Нефтекамск олаште ила да пашам ышта.

– Изиэм годымак сӱретлаш тӱҥалынам. Тиде – авамын суапше. Тудо мыланем икмыняр сӱретым ончыктен, пырля сӱретленна. Вара шкеат тиде пашалан эркын тунемынам.

Нефтекамск оласе художественный школышто вич ий тунемынам. Тушто тунеммем мыланем кугун полшен. Искусствын историйжым мыняр-гынат, живописьыште тӱсым, ӱмылым кучылтмо шотышто пален налынам. Айдемын капшым, чурийжым сӱретлаш тунемынам. Тидлан туныктышем-влаклан тауштем.

2004 ийыште Уфаште сервис институт пеленысе «Истоки» частный колледжыш тунемаш пуренам. Тушто «Дизайнер интерьера и бытовых помещений» специальностьым налынам. А вара армийыш каенам. Кӱртньыгорно войскаш логалынам. Туштат яра жап лийме годым «Колючка» армейский пырдыжгазетым луктынам, боевой листок-влакым ямдыленам.

– Службо деч вара яра жапем шукырак лийын. Тунам вынереш ӱян чия дене сӱретлаш кумылаҥынам. Тыгай технике дене сӱретлаш художественный школышто туныктен огытыл. Шке гыч тунемаш логалын. Мӧҥгыштем чапланыше живописец-влакын книгашт улыт. Эн йӧратыме авторем – Иван Иванович Шишкин. Тудын «Рожь», «Утро в сосновом бору», «Полдень в окрестностях Москвы» да моло пашажым, Европысо сӱретче-влакын пашаштым ончен сӱретленам. Но шке гыч сӱретлымем шуын. Шочмо верем, пӱртӱс кумылаҥденыт. Тидлан мый пӱртӱс лоҥгаш лектын коштынам. Фотом ыштылынам. Моҥгӧ толмек, картинке-влак почеш сӱретленам. Композиций моторрак лийже манын, южгунам кок фотом иктыш ушаш логалын.

– Уке, мый чоҥымо материалым ужалыме кевытыште пашам ыштем. Тидыже нигузеат сӱрет дене кылдалтын огыл. Сӱретым чон йодмо почеш ыштылам.

– Икымше выставкем 2017 ий ноябрьыште лийын. Тунам Нефтекамск оласе сӱретче-влак дене пырля «Ночь искусств» мероприятийыште участвоватленам. Чылаже куд выставкыште лийынам. Тышеч кокытшо персональный ыле.

– Уке, мӧҥгыштӧ веле. Чыла вере – сӱрет-влак. Южгунам тоштерыште илымем гай чучеш.

– Палымем-влак йодын толедат. Моло йодшо-влакат лийыт, шонем.

Кунам айдеме йӧратыме пашам ышта, тидын нерген каласкалымыж годым шинчаже йӱла. Мыят Романын шинчаштыже тиде сескемым ужым. Тек рвезын пашаже тӱвыргӧ лектышан лиеш.

В. Мустаева мутланен.

«Кугарня» газет